मंसीर १६ काठमाडौँ । राष्ट्रिय परीक्षा बोर्डले कक्षा १२ को नतिजा महिना दिनभित्रै सार्वजनिक गर्ने भएको छ । गत बैशाखमै हुनु पर्ने परीक्षा मंसीर ९ गते शुरु भएर १६ गते सकिएको थियो । ४० पूुर्णाकंको मात्र परीक्षा भएको छ । अरु ११ कक्षामा प्राप्त गरेको अंक र आन्तरीक मुल्याकंनका आधारमा दिईनेछ ।
उत्तरपुस्तिका परीक्षण, सम्परीक्षण र नतिजा तयारीका लागि एक महिनाको समय लाग्ने अनुमान गरिएको बोर्डका अध्यक्ष चन्द्रमणि पौडेलले बताए । शिक्षकहरूले उत्तरपुस्तिका परीक्षण गरेर मंसिर २२ सम्म बोर्डको सम्बन्धित कार्यालयमा पठाइसक्नुपर्नेछ ।
बोर्डको प्रदेश र शाखा कार्यालयहरूमा ती उत्तरपुस्तिकाको सम्परीक्षण गरेर केन्द्रमा पठाइनेछ । केन्द्रमा अंक प्राप्त भएपछि कक्षा ११ को प्राप्तांक, आन्तरिक र प्रयोगात्मक परीक्षाको अंक जोडेर नतिजा सार्वजनिकको तयारी बोर्डले गरेको हो ।
