काठमाडौँ , २९ भदौ ।
बलिउड क्षेत्रका विख्यात अभिनेता अमिताभ बच्चन एक ट्वीट् गर्दै एसिड पीडितको न्यायका लागि अभियानरत एक नेपालीलाइ बधाई दिनुभएको छ ।
प्रख्यात अभिनेता अमिताभ बच्चनले एसिड पीडितको न्यायको लागि संघर्षरत अभियन्ता उज्ज्वल विक्रम थापालाई ट्वीट् गर्दै बधाई दिनुभएको हो ।
एसिड छ्यापेर घाइते भएकाहरुको उपचार र न्यायका लागि थापा लामो समयदेखि अभियानरत हुनुहुन्छ । थापाले दोषीलाई दण्डका कठघरामा ल्याउन कानुन निर्माणका लागि पनि दबाब दिने काममा क्रियाशील हुनुहुन्छ ।
दोषीलाई दण्डको प्रक्रियामा ल्याउनका लागि पहल गरेको भन्दै अभिनेता बच्चनले नेपालका थापालाई बधाई दिनुभएको हो ।
सोमबार अभिताभले ‘एसिड पीडितको लागि तपाईँले गर्नुभएको संघर्ष र कठिन कार्यले शेरवुड कलेजमात्र नभई तपाईँको देश नेपाललाई पनि गौरव महशूस गराएको छ ।’ भनेर ट्वीट गर्नुभएको छ ।
बच्चनले थापालाई यस्तै राम्रा सामाजिक कामलाई निरन्तरता दिन शुभेच्छा पनि दिनुभएको छ ।
