काठमाडौँ, ३ साउन । खोकनावासीले शनिवार खुडोल फाँटमा धान रोपेर र भटमासको बिउ छर्दै सांकेतिक विरोध गरेका छन् ।
यसअघि खुडोल फाँटमा धान रोप्न जाँदा प्रहरी र स्थानीयबीच झडप हुँदै आएकोमा शनिवार भने प्रहरीको उपस्थिती थिएन ।
खुडोल फाँट काठमाडौं–तराई जोड्ने द्रुतमार्ग (फास्ट ट्रयाक) को ‘जिरो किलोमिटर’हो । सो क्षेत्रको जग्गा सरकारले अधिग्रहण गरेको छ । तर, स्थानीयले भने मुआब्जा लिइसकेका छैनन् ।
उनीहरुले सरोकारवालासँग छलफल नै नगरि एकलौटी ढंगबाट तयार गरेको मुआब्जा स्वीकार नभएको, फास्ट ट्रयाकसँगै वाग्मती करिडोर, १ सय ३३ केभी प्रसारण लाइन, बाहिरी चक्रपथको विन्दु पनि खोकना फाँटमै पर्ने भएकाले मौलिक बस्तीको अस्तित्व सखाप हुने भन्दै विरोध जनाउँदै आएका छन् ।ऐतिहासिक धार्मिक एवम् सांस्कृतिक क्षेत्रमा धेरै आयोजना परेको भन्दै स्थानीय आक्रोशित छन् ।
यसअघि सोहि क्षेत्रमा धान रोप्ने क्रममा प्रहरी र स्थानीयवासीबीच झडप भएको थियो ।शनिबार भने बिहानै फास्ट्रयाकको प्रस्तावित ० किलोमिटरमा खोकनाबासीले बृहत रोपाइ गरे । जनसरोकार समिति खोकना, ललितपुर नै गठन गरेर स्थानीय आन्दोलित भएका हुन् । सयौंको संख्यामा खोकनाको सिकाली चौरमा भेला भएर फाँटमा धान, मकै र भटमास रोपेका हुन् ।