काठमाडौँ ,१ साउन । सशस्त्र प्रहरी मुख्यालयले दंगा व्यवस्थापन शिक्षालय लामापाटन पोखरामा कार्यरत सशस्त्र प्रहरीका एसएसपी राजेन्द्र अधिकारीलाई निलम्बन गर्न भनि गृहमा पत्र पठाएको छ ।
पक्राउको व्यहोरा पाएलगत्तै सशस्त्र प्रहरी महानिरीक्षक शैलेन्द्र खनालले आरोपित एसएसपी अधिकारीलाई निलम्बन गर्न पत्र पठाएका हुन् ।
एसएसपी अधिकारी विरुद्ध बुधबार जिल्ला प्रहरी कार्यालय कास्कीमा बलात्कार आरोपमा उजुरी परेको थियो ।
चितवन घर भई पोखरामा बस्दै आएकी एक महिलाले एसएसपी अधिकारी विरुद्ध उजुरी दिएपछि कास्की प्रहरीले सशस्त्र प्रहरी बल मुक्तिनाथ बाहिनी सँग समन्वय गरेर उनलाई पक्राउ गरेको थियो ।
प्रहरीले एसएसपी अधिकारीलाई झाडीमा लुकिरहेको अवस्थामा पक्राउ गरेको हो ।
गृहमन्त्रीबाट आईजीपी खनालको पत्र सदर भएपछि अधिकारी औपचारिक रुपमा निलम्बनमा पर्नेछन् ।
अधिकारी गतवर्ष मात्रै लामापाटनमा सरुवा भएका थिए । ‘बलात्कार आरोपमा एसएसपी अधिकारी विरुद्ध उजुरी परेपछि उनीमाथि लागेको कसुरको टुंगो नलागेसम्म निलम्बन गर्न गृहलाई पत्र पठाएका छौं,’ सशस्त्र प्रहरी स्रोतले जनाएको छ ।
अधिकारी पक्राउ परेपछि सशस्त्रको लामापाटन शिक्षालयले पक्राउ पुर्जी र कसुरको विवरण फ्याक्स गरेर मुख्यालयमा पठाएको थियो ।
उनी आजैबाट निलम्बनमा पर्नेछन् ।
