काठमाडौँ जेष्ठ २९ । लामो समयदेखि कोरोनाको प्रभावका कारण अन्ततः सरकारले यस वर्ष माध्यमिक शिक्षा परीक्षा (एसईई)सञ्चालन नगर्ने निर्णय गरेको छ । हिजो साझँ बसेको मन्त्रीपरिषद्को बैठकले यस्तो निर्णय गरेको हो ।
एसइई चैत्रमा हुनु पर्ने भए पनि कोरोनाको जोखिमका कारण परीक्षा स्थगित गरिएको थियो । आन्तरिक मूल्याङ्कनबाटै विद्यार्थीलाई प्रमाणपत्र दिने निर्णय गरिएको शिक्षामन्त्री गिरिराजमणि पोखरेलले जानकारी दिए । त्यसका लागि राष्ट्रिय परीक्षा बोर्डले मापदण्ड बनाउनेछ ।
विद्यालयले यसअघि नै गरेको मूल्याङ्कनलाई स्थानीय तहमा रहेको कक्षा ८ को परीक्षा सञ्चालन गर्ने संयन्त्रबाट सिफारिस गर्ने, उक्त कामको अनुगमन प्रदेश सरकारले गर्ने र बोर्डले प्रमाणीकरण गर्ने प्रस्ताव शिक्षा मन्त्रालयको छ ।
चैत ६ गतेदेखि सञ्चालन गर्न समय तालिका बनाइएको एसईई चैत ५ गते स्थगित गरिएको थियो । ४ लाख ८२ हजार विद्यार्थी एसईई परीक्षाको तयारीमा थिए ।
कक्षा ११ र १२ को परीक्षा के गर्ने भन्ने बिषयमा भने सरकारले अझै निर्णय गर्न बाँकी रहेको छ ।
