घोराही, २२ जेठ । दाङमा दैनिक कोरोना संक्रमितको संख्या बढ्दै जान थालेको छ । राप्ती स्वास्थ्य बिज्ञान प्रतिष्ठानमा आज गरिएको स्वाब परिक्षणमा १५ जनामा कोरोना भाइरसको संक्रमण पुष्टि भएको हो ।
बंगलाचुली गाउँपालिकाका ६, घोराही उपमहानगरका ५, राजपुर गाउँपालिकाका ३ र बबई गाउँपालिकाका एक जनामा कोरोना संक्रमण पुष्टि भएको राप्ती स्वास्थ्य बिज्ञान प्रतिष्ठानले जनाएको छ ।
बंगलाचुली गाउँपालिका वडा नम्बर ४ का १६ देखी २४ बर्ष उमेर समुहका ४ जना, वडा नम्बर ३ का १७ र २२ बर्ष उमेरका २ जनामा कोरोना संक्रमण देखिएको हो ।
यता घोराही उपमहानगरपालिकाको वडा नम्बर ९ का २२, २३ र २६ बर्षका ३ जना, वडा नम्बर १ का १८ बर्षका र वडा नम्बर २ का २१ बर्षका एक एक जनामा पनि कोरोना संक्रमण देखिएको प्रतिष्ठानले जनाएको छ ।
यसैगरी राजपुर गाउँपालिकाको वडा नम्बर २, ३ र ४ का २६, २७ र ३४ बर्षका तीन जना र बबई गाउँपालिका वडा नम्बर ५ का १९ बर्षिय एक जनामा कोरोना पुष्टि भएको छ । यो सँगै दाङमा कोरोना संक्रमितको संख्या ७१ पुगेको छ ।