मुक्तक – १
फूल भएर आऊ आज धागो बन्न सक्छु
रानो बनेर आऊ तिमी खागो बन्न सक्छु
जस्तो धोक्रो उस्तै कोक्रो स्पष्ट छन् कुरा
वारूद बनी आयौ भने आगो बन्न सक्छु !
मुक्तक – २
साँध मिच्यो सँधियारले बार अब लाउँछु
नाङ्गै नाच्यो सिमानामा तार अब लाउँछु
झुक्दिन म हैकमसँग गए गर्दन जाओस्
खिया लाग्या तरवारमा धार अब लाउँछु !
मुक्तक – ३
के के गर्यौ अहिलेसम्म खोल अब सरकार
सक्ने जति खतरा पनि मोल अब सरकार
परायाले माटो लुट्दा किन चुपचाप बस्छौ
ज्युँदै छौ कि मूर्दा भयौ बोल अब सरकार ?
मुक्तक – ४
थाहै नपाई झण्डा पनि कोरिएछ सरकार
सिमानाको दैलो आज फोरिएछ सरकार
खबर आयो लिपुलेकबाट मुटु घोच्ने गरी
चन्दनजस्तो माटो पनि चोरिएछ सरकार !
मुक्तक -५
हजारौं रूख भए पनि हेर्दा वन एउटै हुन्छ
सयौं चोट लागे पनि कुट्ने घन एउटै हुन्छ
सीमानाभित्रै दुष्ट छिरी माटो कुल्चिएपछि
छाती छुट्टै भए पनि दुख्ने मन एउटै हुन्छ !
मुक्तक – ६
आश बेच्यौ सास बेच्यौ सुवानी पनि बेच्यौ
शान बेच्यौ इमान बेच्यौ भवानी पनि बेच्यौ
नोटसँग भोट साँटी देशको ड्राइवर बनेपछि
माटो बेच्यौ पानी बेच्यौ जवानी पनि बेच्यौ !
मुक्तक – ७
स्वाभिमान कतै झुक्यो भने दास तिमी बन्छौ
विश्वासमा खोट लाग्यो भने तास तिमी बन्छौ
पाइँदैन यो जीवन पुनः आत्मसम्मानले बाँचौं
विचारको दियो निभ्यो भने लास तिमी बन्छौ !
मुक्तक – ८
छातीभित्र सिमाना दुख्छ भन मलम कहाँ गयो
सहन खोज्छु सहनै गाह्रो भन सलम कहाँ गयो
सँधियार नै दुष्ट परेछ हजुर भुलचुक माफी हुन्न
स्वाधीनताको गीत लेख्ने भन कलम कहाँ गयो ?
मुक्तक – ९
स्वाधीनताको मूल्य कति किन्ने बेला आएको छ
देशभक्तिको हिसाब अब छिन्ने बेला आएको छ
सिमानाको माटो लुछ्ने लुटेराहरूको विरूध्दमा
सत्तिससाल कि धँगेरी हौ चिन्ने बेला आएको छ !
मुक्तक -१०
घरमा तिहुन छैन आज जालापानी खोज्न जाऔं
शान मान भुइँमा खस्यो नालापानी खोज्न जाऔं
कति सहनु चुपचाप यसै सहनुको नि सिमा हुन्छ
माटो दुख्यो कठै आज कालापानी खोज्न जाऔं !!
