काठमाडौं, १९ चैत ।
भारतको राजधानी दिल्लीमा आयोजित एउटा मुस्लिम धार्मिकसभामा सहभागी भएका २० जना नेपालीको कोरोनाभाइरस परीक्षणका लागि नमुना लिइएको छ ।
दिल्लीस्थित विभिन्न क्वारन्टीनस्थलमा राखिएका उनीहरूको थुकको नमुना सङ्कलन गरेर परीक्षणका लागि पठाइएको दिल्लीस्थित नेपाली दूतावासले जनाएको छ।
भारतीय अधिकारीलाई उदृत गर्दै नेपाली दूतावासका अधिकारीले दिएको जानकारी अनुसार उक्त धार्मिक सभामा २० जना नेपाली पनि सहभागी भएको र सबैलाई क्वारेन्टाइनमा राखि उनीहरुको नमुना संकलन गरिएको छ
ती नेपालीहरूको नमुना परीक्षणका लागि पठाइसकिएको भएपनि नतिजा आउन बाँकी रहेको जनाईएको छ ।
दूतावासले परराष्ट्र मन्त्रालयलाई उक्त धार्मिकसभामा सहभागी नेपालीबारे प्राप्त सबै जानकारी पठाइसकेको छ। त्यसका आधारमा उनीहरूसँगै गएका कोही व्यक्ति नेपाल फर्किसकेको भए उनीहरूको खोजी गर्न मद्दत पुग्ने दूतावासले जनाएको छ।
