चैत्र १६, नयाँदिल्ली ।
कोरोना भाइरसको संक्रमणको त्रास बढेपछि नेपालबाट केही दिनअघि मात्र स्थाई घर भारतको हरियाणा राज्यको अम्बाला शहर फर्किएका एक २१ वर्षीय युवामा कोरोना भाइरसको संक्रमण देखिएको छ ।
पटियाला नजिकको रामनगर गाउँका स्थायी बासिन्दा उनी अघिल्लो सातामात्र नेपालबाट फर्किएका थिए । तर उनलाई नेपाल या भारत कहाँ भाइरस सक्रमण भएको हो भन्ने बारे खुल्न बाकीँ छ ।
संक्रमित युवालाई हाल अम्बालाकै सिभिल अस्पतालमा भर्ना गरिएको तर उनलाई नेपामा नै भाइरसको संक्रमण भयो वा भारत आएपछि भयो भन्नेबारे नखुलेको भारतीय सन्चारमाध्यमले जनाएका छन् ।
अस्पतालका चिफ मेडिकल अफिसर डा. कुलदिपले शनिबार साँझ आएको प्रयोगशाला रिपोर्टमा ती युवामा कोरोना पुष्टि भएको र अहिले उनको अवस्था स्थिर रहेको बताए ।
ती युवा १९ मार्चमा नेपालबाट इण्डिगो एयरलाइन्सको विमान चढेर भारत पुगेको जनाईएको छ ।
संक्रमित युवा कामका लागि अर्का एकजना साथीसँगै गत ९ मार्चमा नेपाल गएका थिए । त्यसपछि उनी १९ मार्चको अपरान्ह तीन बजेको काठमाडौंबाट दिल्ली फर्किएका थिए । दिल्ली विमानस्थलमा जाँचका क्रममा उनको स्वास्थ्य अवस्थामा सामान्य भएकाले उनलाई घरमै गएर होम क्वारेन्टाइनमा बस्न सुझाव दिइएको थियो ।
दिल्ली ओर्लिएपछि मेट्रोबाट कश्मिरीगेट पुगेर बस चढी उनी आफ्नो गाउँ रामनगर पुगेका थिए । २० देखि २६ मार्चसम्म उनी घरमै बसेका थिए । २६ मार्चमा चर्को ज्वरो र पेट दुख्ने भएपछि घरमै औषधि खाएका उनलाई नजिकैको सिटि सिभिल अस्पताल र्पुयाइएको थियो ।
शनिबार राति आएको रिपोर्टमा उनमा कोरोना भाइरसको संक्रमरण रहेको पुष्टि भएको हो । उनलाई कोरोनालागेको पुष्टि भएपछि अहिले पुरै परिवार त्रसित बनेको छ । र, सबैलाई आइसोलेसनमा राखिएको छ ।