कीर्तिपुर, २९ फागुन ।
पत्रकार जितेन्द्र महर्जन रिहा भएका छन् । नेपाल भाषाको पत्रिका न्हुगु जोजोलोपाका प्रधान सम्पादक तथा रेडियो मिर्मिरेका कार्यक्रम सन्चालक महर्जन आज जिल्ला प्रशासन कार्यलय काठमाडौंबाट धरौटीमा रिहा भएका हुन् ।
उनलाई यसअघि फागुन १४ गते कीर्तिपुरबाट प्रहरीले पक्राउ गरेको थियो । समाचार संकलन तथा प्रकाशनको काम सकेर कार्यलयबाट घर फर्कदै गरेको अवस्थामा किर्तिपुरको नयाँवजारबाट पक्राउ गरि महानगरीय प्रहरी परिसर टेकुमा राखिएको थियो । पत्रकार महर्जन जनपत्रकार संगठन नेपालका काठमाडौं संयोजक समेत हुन् ।
पक्राउ परेको १५ दिनपछि उनलाई आज जिल्ला प्रशासन कार्यालय काठमाडौंले पाँच हजार धरौटीमा रिहा गरेको हो । पत्रकार महर्जनको रिहाईका लागि जनपत्रकार संगठन नेपाल, नेपाल पत्रकार महासंघ काठमाडौं, नेपाल पत्रकार महासंघ मिर्मिरे प्रतिष्ठानलगायतका सम्बन्धित संघसस्था तथा सरोकारवालाले पहल गरेका थिए ।
यसअघि चैतमा पनि उनलाई विप्लव नेतृत्वको नेपाल कम्युनिस्ट पार्टीको नेता भन्दै पक्राउ गरेको थियो ।