काठमाडौं, फागुन १९ । राष्ट्रिय योजना आयोगको पूर्ण बैठकले १५औं योजना पारित गरेको छ ।
सोमबार प्रधानमन्त्रीको सरकारी निवास बालुवाटारमा बसेको राष्ट्रिय योजना आयोगको पूर्ण बैठकले १५औं योजनालाई पारित गरेको हो । १५औं योजनाको आधारपत्र भने गत वैशाख १७ गते पारित भएको थियो ।
१५औं योजनामा ‘समृद्ध नेपाल, सुखी नेपाली’ बनाउने राष्ट्रिय लक्ष्यलाई पूरा गर्नेगरी २५ वर्षे दीर्घकालीन सोचसहितका कार्यक्रमहरु समावेश गरिएको छ ।
त्यस्तै, संविधानको पूर्ण कार्यान्वयन गर्न, संघ, प्रदेश र स्थानीय तहबीच सहकार्य गर्दै मुलुकलाई समृद्ध र समुन्नत बनाउने संकल्प पनि १५औं योजनाले गरेको छ ।
बैठकपछि सञ्चारकर्मीहरुसँग कुरा गर्दै राष्ट्रिय योजना आयोगका उपाध्यक्ष डा। पुष्प कँडेलले प्रधानमन्त्री केपी शर्मा ओलीले राष्ट्रिय गौरवका २२ ओटा आयोजनालाई व्यवस्थितरुपमा अगाडि बढाउन निर्देशन दिएको जानकारी दिए । मुलुकको समृद्धि र गरिबीको सूचकांकको दर घटाउने विषयमा छलफल भएको उनको भनाइ थियो ।
उपाध्यक्ष डा। कँडेलले रुपान्तरणकारी १८ ओटा परियोजना र ११७ ओटा प्रमुख कार्यक्रमलाई अगाडि बढाउन पनि प्रधानमन्त्री ओलीले निर्देशन दिएको बताए । बैठकमा गरिबी र बेरोजगारी दर घटाउने खालका परियोजनाको बारेमा छलफल भएको थियो ।
