पोखरा, १५ मङ्सिर ।
कास्कीको पोखरा महानगरपालिकाको–२० स्थित मौंजा विसौंनामा आज बिहान माटोको ढिस्कोमा पुरिएर मृत्यु हुनेकेा सङ्ख्या पाँच पुगेकेा छ ।
मृत्यु हुनेमा मजदुर सल्यानको बाघचोर नगरपालिका–४, पेदीखोलाका तोबान बस्नेत, जितबहादुर बस्नेत, खिमलाल ओली र गणेश ओली रहेको जिल्ला प्रहरी कार्यालय, कास्कीका प्रवक्ता राजकुमार केसीले जानकारी दिनुभयो ।
भलाम–मौंजा ग्रामीण सडक खन्ने क्रममा माटोको ढिस्कोले पुरिएर ती कामदारको मृत्यु भएको हो ।
यसैबीच, कास्कीको पोखरा महानगरपालिका २० मौजामा ढिस्कोले पुरिएर सल्यानका ५ जना मजदुरको निधन भएको घटनाप्रति नेत्र विक्रम चन्द विप्लव नेतृत्वको नेपाल कम्युनिस्ट पार्टी सल्यानले दुख व्यक्त गरेको छ ।
उक्त पार्टी सल्यान जिल्ला सेक्रेटरी लोक्पालले आइतबार जारी गरेको शोक वक्तव्यमा बागचौर नगरपालिका वडा नम्बर ५ पेदिखोला निवासी जागेन्द्र बुढाथोकी, दोभान बस्नेत, जित बहादुर बस्नेत, गनेश ओली र खिमलाल ओलीको मृत्यु भएको जनाइएको छ ।
वक्तव्यमा भनिएको छ, ‘देशमा व्याप्त बेरोजगारी समस्याले गर्दा आम जनसमुदायीहरु दिन प्रतिदिन रोजगारीको लागि घर छोड्न बाध्य भएका छन् । एकतिर सरकारले युवा रोजगारको नारा लगाउदै आफ्नो सत्ता लम्ब्याइरहेको छ भने अर्कोतर्फ गरिबीको कारण युवाहरु रोजगारको लागि आफ्नो ज्यान बाजीमा राखिरहेका छन् । यो देशको कहालीलाग्दो अवस्था हो ।’
साथै उक्त पार्टीले आगामी दिनमा यस्ता कामहरुमा सम्बन्धीत निकायले सतर्कता अपनाउन र सरकारलाई रोजगारको ग्यारेन्टी गर्न आग्रह गरेको छ । वक्तव्यमा मृतकको परिवारलाई उचित क्षतिपुर्ती दिन माग गरिएको छ ।
