मंसिर ११, काठमाडौं ।
१३औं दक्षिण एसियाली खेलकुद (साग) अन्तर्गत हुने भलिबल प्रतियोगिता आजदेखि सुरु हुँदैछ । त्रिपुरेश्वरस्थित राखेप कभर्ड हलमा आज पुरुष र महिला दुवै तर्फको समूह चरणका खेलहरु सुरु हुनेछ ।
प्रतियोगिताको सम्पूर्ण तयारी पूरा भएको आयोजकले जनाएको छ । समूह चरण अन्तर्गत नेपालको दुवै टोलीले आफ्नो पहिलो खेलमा बंगलादेशसँग खेल्दैछ ।
नेपाली महिला टिमले बंगलादेशसँग अपरान्ह ३ बजे प्रतिस्पर्धा गर्दा पुरुष भलिबल टोलीले साँझ ७ बजे बंगलादेशसँग नै प्रतिस्पर्धा गर्नेछ ।
दुई साताअघि बंगलादेशमा भएको एभीसी सिनियर सेन्ट्रल जोन वुमन्स भलिबल च्याम्पियनसिपमा गोल्ड मेडल जितेको नेपाली महिला भलिबल टिमले त्यसको खुसी मनाउन नपाउँदै घरेलु कोर्टमा १३ औं साग खेल्न लागेको हो ।
महिला टोलीलाई सेन्ट्रल जोनको उपलब्धिलाई जोगाउनु पनि छ । त्यसैले घरेलु कोर्टमा खेल्दा उत्साह र दबाव दुवै रहेको महिला टिमका कप्तान अरुणा शाहीले बताइन् ।
