काठमाडौं, ५ मंसिर ।
अन्तराष्ट्रिय ओलम्पिक कमिटिले ब्राजिलमा सन् २०१६ मा भएको रियो ओलम्पिक खेलाउने बक्सिङका सबै रेफ्री तथा निर्णायकमाथि प्रतिबन्ध लगाएको छ ।
अन्तराष्ट्रिय ओलम्पिक कमिटिले गठन गरेको बक्सिङको विशेष कार्यदलले रियो ओलम्पिक खेलाएका सबै ३६ जना रेफ्री तथा निर्णायकलाई कारवाही गरेको हो ।
उनीहरुले अर्को वर्ष जापानमा हुने टोकियो ओलम्पिक खेलाउन नपाउने भएका छन् । अन्तराष्ट्रिय बक्सिङ महासंघ (आईबा)बाट प्रमाणित रेफ्रीहरुको समुहबाट नयाँ मापदण्ड पूरा गर्नेहरुलाई टोकियो ओलम्पिकको लागि छानिनेछ ।
यसअघि आईबाले गठन गरेको छुट्टै समितिले रियो ओलम्पिक खेलाउने रेफ्रीहरुलाई उन्मुक्ती दिने प्रयास गरेको थियो । तर आइओसीले बेग्लै संयन्त्र बनाएर उनीहरुमाथि कारवाही गर्नाले रियो ओलम्पिकमा बक्सिङ खेलमा रेफ्री तथा निर्णायकको भूमिका र खेलको निर्णयमै गम्भिर आशंका उब्जाएको छ ।
