काठमाडौं, मंसिर ४ ।
सिरहाको लहानबाट अपहरण गरेको भनिएको नेपाल आयल निगमको तेल ढुवानी गर्ने ट्यांकर प्रहरीले फेला पारेको छ । हराएको ट्यांकर धनुषाको क्षिरेश्वरनाथ नगरपालिका–१ स्थित रमदैयाबाट मंगलवार नै प्रहरीले नियन्त्रणमा लिएको हो ।
प्रदेश २ का प्रहरी प्रमुख डीआईजी प्रद्युम्न कार्कीले ढल्केबरबाट १० किलोमिटर दक्षिणमा ट्यांकर भेटिएको पुष्टि गर्नु भएको हो । भेटिएको ट्यांकरमा तेल खन्याइएकाले तेल कहाँ खन्याइयो भन्ने विषयमा खुलेको छैन ।
बाराको अमलेखगंजस्थित नेपाल आयल निगमको डिपोबाट २० हजार लिटर डिजेल भरेर प्रदेश १ को राजधानी विराटनगरतर्फ जाने क्रममा ना.४ख ४१६३ नम्बरको टयांकर अपहरण गरेको बताइएको थियो ।
यद्यपि, दाबी गरिएजस्तो अपहरण भएको थियो या चालककै संलग्नतामा तेल बिक्री गर्न अपहरणको नाटक गरिएको थियो भन्ने खुलेको छैन । टयांकरका चालक रामदेव यादव र सह–चालक उमेश यादवलाई नियन्त्रणमा लिएर घटनाबारे अनुसन्धान भइरहेको डीआईजी कार्कीले जानकारी दिनुभयो ।