काठमाडौं, मंसिर ३ ।
फिफा विश्वकप छनोट प्रतियोगिताअन्तर्गत दोस्रो चरणको खेलमा नेपालले आज कुवेतसँग प्रतिस्पर्धा गर्दैछ ।
खेल भुटानको चाङ्लिमिथाङ रंगशालामा अपरान्ह पौने तीन बजे सुरु हुनेछ । दशरथ रंगशालामा समयमै बन्न नसक्दा नेपालले आफ्नो होम म्याच भुटानमा खेल्न लागेको हो ।
कुवेतसँग पहिलो लेगमा ब्यहोरेको फराकिलो हारको बदला लिने अवसर नेपाललाई छ। यस अघि कुवेतसँगको अवे खेलमा नेपालले ७–० को हार व्यहोरेको थियो।
तर, भुटानमा नेपाल त्यस हारलाई बिर्साउने प्रदर्शन गर्न चाहन्छ। छनोटको समूह बीमा नेपाल समूहको चौंथो स्थानमा छ।
छनोटको सबै अवे खेल खेलिसकेको नेपालले ४ खेलमा ३ अंक जोडेको छ। कुवेत ७ अंक जोडेर दोस्रो स्थानमा रहेको छ।
विमल घर्ति मगरसहित चार खेलाडी एन्फाको कारबाहीमा परेको हुँदा टिममा छैनन् ।
राष्ट्रिय टिममा रहँदा रातको समयमा नाईट क्लबमा भेटिएको भन्दै एन्फाले विमलसहित मिडफिल्डर अन्जन बिष्ट, सन्तोष तामाङ र डिफेन्डर दिनेश राजवंशीलाई टिमबाट बाहिर राख्दै अनुशासनको कारबाही गर्ने जनाएको छ।
