४ कार्तिक, काठमाडौं ।
इङ्गलिस प्रिमियर लिग फुटबलमा शीर्ष स्थानको लिभरपुलले म्यानचेस्टर युनाइटेडसँग बराबरीमा रोकेको छ । म्यान्चेस्टर युनाइटेडको मैदानमा आइतवार राति भएको खेल १–१ गोलको बराबरीमा सकिएको हो ।
खेलको ३६ औं मिनेटमा मार्कोस राष्फोर्डले गोल गर्दै घरेलु टोली म्यानचेस्टर युनाइटेडलाई अग्रता दिलाए ।
तर, खेलको ८५ औं मिनेटमा सब्सटीच्युट खेलाडी एडम लालनाले गोल गर्दै लिभरपुललाई हारबाट जोगाए ।
खेल बराबरीमा रोकिएपनि लिभरपुलले अंक तालिकाको अग्रता भने कायमै राखेको छ ।
लिभरपुलले ९ खेलबाट २५ अंक जोडेको छ । जारी लिगमा अघिल्ला ८ खेल जितेको लिभरपुलको यो पहिलो बराबरी हो ।
समान खेलबाट १९ अंक जोडेको म्यान्चेस्टर सिटी दोस्रो स्थानमा रहँदा तेस्रो स्थानको लेष्टर सिटी र चौथो स्थानको चेल्सीको समान १७ अंक रहेको छ ।
१५ अंकसहित पाँचौ स्थानमा रहेको आर्सनलले आज राति सेफिल्ड युनाईटेडसँग खेल्नेछ ।
