असोज २५ काठमाण्डौं । लामो प्रतिक्षापछि नेपाल आउन लागेका चीनीया राष्ट्रपति सि जिन पिगंको नेपाल भ्रमण आजबाट शुरु हुदैछ । आज अपरान्ह साढे ४ बजे पछि राष्ट्रपति सि काठमाण्डौंमा बिशेष विमानबाट अवतरण गर्नुहुने छ ।
राष्ट्रपति सि को स्वागतका लागि राष्ट्रपति विद्यादेवी भण्डारी विमानस्थलमा पुग्नु हुने छ । त्यसै गरी उपराष्ट्रपति , प्रधानमन्त्री सहित उच्च सरकारी अधिकारीहरु पनि विमानस्थलमै हुनेछन् ।
राष्ट्रपतिको स्वागत पछि नेपाली सेनाले गाराथ सलामी अर्पण गर्ने छ भने राष्ट्रपति भण्डारीले उपराष्ट्रपति पुन सहित अन्य उच्च सरकारी अधिकारीहरुलाई परिचय गराउनु हुने छ ।
साँझ साढे ६ बजे राष्ट्रपति सीले नेपालका समकक्षी राष्ट्रपति भण्डारीसँग शीतल निवासमा भेटवार्ता गर्ने कार्यक्रम रहेको छ । भेटवार्तालगत्तै उनी राष्ट्रपति भण्डारीले सोल्टी होटलमा आयोजना गर्ने रात्रिभोजमा सहभागी हुने जनाइएको छ ।
शनिबारै साँझ राष्ट्रपति सीसित प्रमुख प्रतिपक्ष दल नेपाल कांग्रेसका सभापति शेरबहादुर देउवाले शिष्टाचार भेट गर्नेछन् । आइतबार बिहान साढे १० बजे द्विपक्षीय सम्झौताहरुमा हस्ताक्षर हुने छ ।
त्यसअघि, प्रधानमन्त्री केपी शर्मा ओलीसहित विभिन्न दलका नेताहरुसँग चिनियाँ राष्ट्रपति सीले भेटवार्ता गर्ने कार्यक्रम रहेको छ । राष्ट्रपति सी आइतबार दिउँसो साढे १२ बजे पछि स्वदेश फर्कने कार्यक्रम रहेको छ ।