असोज १५ काठमाण्डौं । संसद सचिवालयमा काम गर्ने एक महिलामाथि बलाात्कारको आरोपपछि सभामुख पदबाट राजीनामा दिएका कृष्णबहादुर महराले हिजोको राजीनामा पत्रमा भाषा नमिलेको भन्दै आलोचना भए पछि आज त्यसलाई सच्याएर पुनः राजीनामा दिएका छन् ।
हिजो छानविन नहुञ्जेलका लागि भनेर लेखिएको भाषाको बारेमा विरोध भए पछि आज फेरी नैतिकताका आधारमा भन्दै राजीनामा उपसभामुख समक्ष बुझाएका हुन् ।
उनले हिजोकै मितिमा राजीनामा पत्रको व्यहोरा सच्याएर उपसभामुख शिवमाया तुम्बाहाम्फेलाई दिएका हुन्।
महराले मंगलबार ‘छानबिन प्रक्रिया नसकिंदासम्मका लागि’ राजीनामा दिएको उल्लेख गरेका थिए। तर उनले नयाँ राजीनामा पत्रमा भने त्यो वाक्य हटाएका छन्।
स्रोतका अनुसार महराले नयाँ राजीनामा पत्रमा ‘नैतिकताका आधारमा आजकै मितिदेखि राजीनामा दिएको छु’ भनेर उल्लेख गरेका छन्।
संसद सचिवालयमै कार्यरत एक कर्मचारीलाई बलात्कार गरेको आरोप लागेपछि महरालाई सभामुख र सांसद पदबाट राजीनामा गर्न नेकपाको सचिवालय बैठकले सुझाएको थियो। तर महराले सभामुख पदबाट मात्र राजीनामा दिएका छन्। उनले पार्टी सचिवालय बैठकको निर्णयअनुसार सांसद पदबाट राजीनामा दिएका छैनन्।
महराले नयाँ राजीनामा पत्र बुझाएपछि संघीय संसद सचिवालयले राजीनामाको सूचना टाँसेको छ । महराले सांसद पदबाट राजीनामा नदिए राजनीतिक दलसम्बन्धी ऐनको दल त्यागसम्बन्धी व्यवस्थामार्फत् महरालाई हटाउने चेतावनी नेकपाले दिइसकेको छ ।
महराले राजीनामा दिएसँगै उनको नाम संघीय संसद सचिवालयको वेवसाइटबाट समेत हटाइएको छ ।