काठमाडौं, भदौ ४ । नेपाल ओलम्पिक कमिटी (एनओसी)को नयाँ कार्यसमितिको निर्वाचनका लागि मताधिकार प्रतिनिधिको टुंगो लागेको छ।यही भदौ २० गते निर्वाचन हुन लागेकाे छ । बुधबार अपराह्न ५ बजेसम्मको समय दिइएकामा नयाँ अनुहारकारुपमा अन्तिम समयमा राष्ट्रिय खेलकुद परिषद् (राखेप)का उपाध्यक्ष पिताम्बर तिम्सिना आएका छन् ।
उनी एथ्लेक्टिस संघको प्रतिनिधिकारुपमा मताधिकार लिएर आएका हुन् । यसअघि, एथ्लेटिक्स संघबाट राजीव शाह आएपनि उनको स्थान तिम्सिनाले लिएका हुन् । तिम्सिनाले आफू मताधिकारसहित आएको स्पस्ट पार्दै ओलम्पिक कमिटीको सर्वसम्मत् नेतृत्व चयनका लागि भूमिका खेल्ने बताएका छन् । उनले आफू पनि कार्यसमितिमै रहनेगरी आएको दाबी गरेका छन् ।
त्यस्तै, बक्सिङ संघबाट हालको कार्यसमितिमा उपमहासचिव रहेका राजीव श्रेष्ठ क्यानोइङ संघबाट मताधिकार लिएर आएका छन् ।दुईजनाको यो छलाङले नयाँ समीकरण बन्ने अपेक्षा गरिएको छ । नयाँ कार्यसमिति १९ सदस्यीय हुनेछ । यसअनुसार अध्यक्ष, पाँच उपाध्यक्ष, महासचिव, सहमहासचिव, कोषाध्यक्ष, तीन सचिव र सात सदस्य रहनेछन् ।
त्यस्तै, निवर्तमान अध्यक्ष मानार्थ अध्यक्ष रहने प्रावधान हटाइ कुनैपनि पूर्वअध्यक्षहरुलाई मानार्थ बनाउने प्रावधान राखिएको छ । नेतृत्वका लागि वर्तमान अध्यक्ष जीवनराम श्रेष्ठ र पूर्वउपाध्यक्ष उमेशलाल प्रधानबीच प्रतिस्पर्धा हुनेछ । यसअघिको निर्वाचनमा पनि यी दुवैबीच भिडन्त भएको थियो ।
