बुटवल, साउन १३ ।
नेपाली कांग्रेसका नेता डा. चन्द्र भण्डारीले सरकारका सवै पखेटाहरुमा खिया लागिसकेको टिप्पणी गर्नु भएको छ । उहाँले प्रधानमन्त्री एक्लैले गर्न खोजेर मात्र नहुने भन्दै काम गर्ने वातावरण नरहेको बताउनु भयो ।
बुटवलमा आज सञ्चारकर्मीहरुसँग कुरा गर्दै कांग्रेस नेता भण्डारीले प्रधानमन्त्री केपी शर्मा ओलीले चुनावका बेला राष्ट्रयताबारे जनतालाई देखाएको सपना अधुरो बन्दै गएको बताउनु भएको हो ।
प्रधानमन्त्री ओलीले राष्ट्रियताका विषयमा जुन चेक दिनु भएको छ त्यो पाँच बर्षमा बाउन्स हुने भन्दै उहाँले त्यस पश्चात जनताले कारवाही गर्ने बताउनुभयो । उहाँले प्रधानमन्त्रीले विकास र समृद्धिको काम भन्दा बोल्ने काम मात्र बढी गर्नु भएको बताउनु भयो ।
सरकारले सिन्को नभाच्दा पनि कांग्रेसलाई फाइदै भएको उहाँको भनाई छ । कांग्रेस नेता भण्डारीले भ्रष्टाचारकै कारण मुलुकको विकासले गति लिन नसकेको दाबी गर्नु भयो । भ्रष्टाचारका कारण दुई जना पूर्व कर्मचारीले आत्महत्या गरेको बताउदै उहाँले राजनीतिक दलका नेताहरुले पनि आत्महत्या गर्ने दिन आउन सक्ने बताउनु भयो ।
कांग्रेसका धेरै नेताहरु भ्रष्टाचारमा जेल परे पनि नेकपाले खुलमखुला भइरहेका भ्रष्टाचारलाई लुकाएको भन्दै नेता भण्डारीले वाइडबडी, ललितानिवास, बुढीगण्डकी लगायतका काण्डका दोषिलाई कारबाही गर्नैपर्ने बताउनु भयो ।