उदयपुर, १३ साउन ।
सरकारी स्वामित्वको उदयपुर सिमेन्ट उद्योग दुई महिनादेखि बन्द रहेकाे छ ।विद्युत् भोल्टेजको गडबढीले हाइटेन्सन जिबीएफ फ्यान मोटरमा क्षति पुग्दा ५५ दिनदेखि सिमेन्ट उत्पादन बन्द भएको हो ।
सिमेन्ट उत्पादन बन्द हुँदा दैनिक १ करोड रुपैयाँभन्दा बढीको क्षति भएको छ । साे अनुपातमा गत जेठ २० गतेदेखि उत्पादन नहुँदा उद्योगलाई ५० करोडभन्दा बढी नोक्सानी भइसकेको छ ।
जापानी फुजी कम्पनीको मोटर खरिद गर्दा १ करोड ५० लाखसम्म लाग्ने भए पनि इन्डियन कम्पनीको खरिद गरेर ६५ देखि ७० लाख लाग्न सक्ने प्राविधिकहरु बताउँछन् ।
बिग्रिएको मोटर नेपाल ईन्जिनियरिङ एन्ड हाइड्रो वर्कसप बुटवल पठाइएको दुई महिना बित्न लाग्दा पनि उद्योग व्यवस्थापनको ढिलासुस्तीले मर्मत हुन सकेको छैन । चालू आर्थिक वर्षमा २६ लाख बोरा सिमेन्ट उत्पादनको लक्ष्य राखिएकोमा २२ लाख ६२ हजार १ सय ४२ बोरा उत्पादन भइसकेको उद्योगका निमित्त महाप्रबन्धक नोबलकिशोर साहले बताए ।
दैनिक ८ देखि १० हजार बोरा सिमेन्ट बिक्री भइरहेकोमा अब मौजाद रहेको सिमेन्टले एक हप्ता मात्र धान्ने उद्योग प्रशासनले जनाएको छ ।