बर्दिया, साउन ८ ।
बर्दियामा हिजो देखिको लगातारको वर्षाका कारण आएको बाढीले बगाएर ल्याएको काठ लिन जाँदा बबई नदीले तीन जनालाई बगाएको छ । बाढीले बगाएका तीन जनामध्ये एक जनाको उद्धार गरिएको छ भने दुई जना बेपत्ता छन् ।
राष्ट्रिय आपत्कालीन कार्य सञ्चालन केन्द्रले बाढी आएको बेला दाउरा लिन तथा माछा मार्न नजान अपील पनि गरेको छ । अविरल वर्षाले बर्दियाको बासगढी नगरपालिका—३ खल्ला बस्तीका ४० घर डुबानमा परेका छन् । डुबानले मानवीय क्षति नभएको जिल्ला प्रशासन कार्यालयले जारी गरेको विज्ञप्तिमा जनाएको छ ।
वर्षाका कारण बर्दियाबाट बग्ने बबई नदीमा जलस्तर बढ्दै गएकाले तटीय क्षेत्रका बासिन्दा बाढीको जोखिममा परेका छन् । स्थानीय प्रशासनले बबई नदी तटीय क्षेत्रका बासिन्दालाई उच्च सर्तकता अपनाउन आव्हान गरेको छ ।
दाङमा पानी नरोकिएकोले बबईमा जलस्तर बढ्दै जाने खतरा बढेको प्रजिअ रामबहादुर कुरुम्बाङले जानकारी दिनुभयो । यस्तै अविरल वर्षाका कारण दाङका देउखुरीका केही भूभाग डुबानामा परेका छन् । राप्ती गाउँपालिकाको लठ्वा, पहरुवा, सिगै लगायतका गाउँ डुबानमा परेका छन् । स्थानीय दोलही खोलामा आएको बाढीका कारण ती गाउँ डुबानमा परेका हुन् ।
उता धनकुटा नगरपालिका वडा नम्बर ८ डाँडाटोलमा एकै परिवारका ३ बालबालिकालाई तमोर नदीले बगाएको ४ दिन हुँदा समेत अवस्था पत्ता लाग्न सकेको छैन । ९ वर्षिय सन्दीप राई र उनका बहिनीहरु ७ वर्षकी सलिना र ४ वर्षकी सञ्जीलालाई गत आइतबार साँझ तमोर नदीले बगाएको थियो ।
स्कुलबाट फर्किएर बाबुआमासँगै खेतमा पुगेका उनीहरुलाई एक पछि अर्को गर्दै तमोरले बगाएको थियो । जनप्रतिनिधि र प्रहरी प्रशासनको वेवास्थाका कारण आफ्ना तीनै जना सन्तानको अवस्था पत्ता लाग्न नसकेको बुवा शंख राईले बताउनुभयो ।
