काठमाडौं, साउन ४
प्रि–सिजन टूर अन्तर्गत भएको मैत्रीपूर्ण खेलमा लिभरपुल पराजित भएको छ । नयाँ सिजनको तयारीमा रहेको युरोपेली च्याम्पियन लिभरपुल अमेरिकाको इन्डियानामा आज विहान भएको मैत्रीपूर्ण खेलमा जर्मन क्लब बोरसिया डर्टमण्डसँग ३–२ गोलअन्तरले पराजित भएको हो ।
लिभरपुलले खेल सुरु भएको तेस्रो मिनेटमै गोल खाएको थियो । जियो रेइनाको पासमा पाको अल्कासरले गोल गरेका थिए । ३५ औंँ मिनेटमा फाबिनोको पासमा ह्यारी विल्सनले गोल गरेपछि पहिलो हाफमा लिभरपुलले बराबरी गरेको थियो ।
तर, दोस्रो हाफमा ५ मिनेटको अन्तरमा २ गोल खाएपछि लिभरपुल खेलमा फर्कन सकेन । ५३ औंँ मिनेटमा थोमस डेलानी र ज्याकोव ब्रुन लार्सेनले ५८ औं मिनेटमा गोल गरी डर्टमण्डलाई ३–१ को अग्रता दिलाए ।
प्रशिक्षक क्लोपले ६० औं मिनेटमा गोलरक्षकबाहेक १० खेलाडी परिवर्तन गरी खेलमा फर्काउने प्रयास गरे पनि सफल भएनन् । डिभोक ओरिगीलाई प्रतिस्थापन गरेका रेहिन ब्रेस्टरले ७५ औं मिनेटमा पेनाल्टीमार्फत एक गोल गरे पनि लिभरपुलले खेलमा आफ्नो पराजय टार्न सकेन ।
यसअघि दुई ओटा मैत्रीपूर्ण खेलमा इंग्लिस टोलीविरुद्ध फराकिलो जित हासिल गरेको लिभरपुलले अमरिका भ्रमणलगत्तै पहिलो पराजय भोगेको हो ।
