काठमाडौं ३० असार ।
असार २६ गतेदेखि परेको अविरल वर्षापछिको बाढी, पहिरो र डुबानको कारण हालसम्म ७८ जनाको मृत्यु भएको छ । गृह मन्त्रालयका अनुसार आज दिउँसोसम्म ३२ जना बेपत्ता र ४० जना घाइते भएका छन् ।
बाढी पहिरोमा परेर १७ हजार ४ सय २० घरधुरी विस्थापित भएको गृह मन्त्रालयले जनाएको छ । गृह मन्त्रालयले तीन हजार ३ सय ६६ जनाको उद्धार गरिएको छ ।
गृह मन्त्रालयको राष्ट्रिय आपत्कालीन कार्य सञ्चालन केन्द्रका प्रमुख वेदनिधि खनालले ती घरधुरीका मानिसलाई अस्थायी आश्रयस्थलमा राखिएको र राहत वितरण कार्यलाई तीव्रता दिएको बताउनु भएको छ ।
अझै केही दिन आंशिक र केही स्थानमा बढी वर्षा हुने अनुमान जल तथा मौसम विज्ञान विभागको छ । अहिलेसम्म बाढी पहिरो र डुबानबाट ३२ जिल्ला प्रभावित भएको छ । बेपत्ताको खोजी र राहत कार्य तीव्र पारिएको सरकारले जनाएको छ । तीनै तहका सुरक्षा निकायका ४१ हजार बढी जनशक्ति उक्त अभियानमा सक्रिय छन ।
