काठमाडौं, असार ६ ।
संघीय संसदको कृषि, सहकारी तथा प्राकृतिक स्रोत समितिले वातावरण संरक्षण विधेयकबारे वातावरण विद्हरुसँग परामर्श गरेको छ ।
सिंहदरबारमा आज बसेको बैठकमा वातावरण संरक्षण विधेयकमाथिको छलफलको क्रममा समितिले वातावरणविदहरुसँग परामर्श गरेको हो । समितिले जलवायु परिवर्तन न्यूनिकरण र वातावरणीय प्रभाव कम गर्ने उपायबारे विज्ञसँग परामर्श गरेको हो ।
वातावरणविद् डा.कृष्णचन्द्र पौडेलले वातावरण संरक्षणका लागि तल्लो तहलाई बढी जिम्मेवार बनाउनुपर्ने विषय विधेयकमा समेट्न सुझाव दिनुभयो । उहाँले स्थानीय तहमा वृक्षारोपण गर्ने, गिट्टी बालुवा उत्खननमा रोक लगाउने, जथाभावी खोलिएका इट्टाभट्टा नियन्त्रण गर्न स्थानीय तहलाई बढी जिम्मेवार बनाउन जरुरी रहेको औंल्याउनुभयो ।
वातावरणविद् भूषण तुलाधरले सार्वजनिक र सरकारी वनबारे स्पष्ट प्रावधान राख्न सुझाव दिनुभयो । सरकारले चाहँदैमा वन क्षेत्रको भूउपयोग परिवर्तन गर्न नहुने उहाँको भनाइ थियो ।
