बैतडी, असार ५ ।
मोटरसाइकल दुर्घटनामा परी घाईते बैतडीको पुर्चौडी नगरपालिका–४ का वडाध्यक्ष गौतमप्रसाद भट्टको आज बिहान मृत्यु भएको छ ।
पुर्चौडी नगरपालिकाका नगरप्रवक्ता समेत रहेका भट्टको उपचारका क्रममा कोहलपुर मेडिकल कलेजमा आज बिहान मृत्यु भएको बैतडीका प्रहरी प्रवक्ता प्रहरी निरीक्षक दीपक पातलीले जानकारी दिनुभयो ।
वडाध्यक्ष भट्ट वडा कार्यालयबाट घर जाँदै गर्दा गत बुधबार वडा नं ४ को चक्कीबगड भन्ने स्थानमा बा२ब २५२ नम्बरको मोटरसाइकल दुर्घटनामा परेका थिए ।
दुर्घटनामा परी गम्भीर घाइते भट्टको जिल्लामा उपचार हुन नसक्दा थप उपचारका लागि कोहलपुर सिफारिस गरिएको थियो । कोहलपुर मेडिकल कलेजमा सघन उपचारकक्ष (आइसियू) मा राखेर उपचार हुँदाहृुँदै भट्टको बिहान ३ बजे मृत्यु भएको हो ।
यसैबीच वडाध्यक्ष तथा नगर प्रवक्ताको निधन भएपछि पुर्चौडी नगरपालिकाले आज शोकसभा पारित गर्दै आज नगरपालिकाका सम्पूर्ण काम स्थगन गरिएको नगरप्रमुख रणबहादुर कुँवरले बताउनुभयो । मृतक भट्ट सत्तारुढ नेपाल कम्युनिष्ट पार्टी (नेकपा) का बैतडी जिल्ला कमिटी सदस्यसमेत थिए ।
