सिन्धुपाल्चोक, ३० जेठ ।
नेपाल कम्युनिष्ट पार्टीका अध्यक्ष पुस्पकमल दाहालले विनासकारी भूकम्पमा नेपालका राजनीतिक दलहरु बीच पैदा गरेको एकता अहिलेपनि आवश्य रहेको बताएका छन् ।
सिन्धुपाल्चोक जिल्लाको बलेफी गाउँपालिका–६ माङ्खामा बिहिवार आयोजित श्री कूपकन्या माध्यमिक विद्यालयको नवनिर्मित भवन समुद्घाटन गर्दै अध्यक्ष दाहालले सो बेलाको एकताले संविधान बनेको चर्चा गरे ।
दाहालले भने, ‘भूकम्पले नेताहरुको अहंकार तोड्यो र सबै जनताको सेवामा एकजुट भए । सोही एकताका कारण संविधान निर्माण सम्पन्न भयो ।’
नकारात्मक कुरालाई सकारात्मक कुरामा रुपान्तरण गर्न सकिने यो एक उदाहरण भएको उनको भनाई थियो । ‘समृद्धिका लागि हामीले छिमेकी र अन्तराष्ट्रिय समुदायसँग सन्तुलित सम्बन्धको वातावरण बनाएर नेपाललाई नयाँ युग तिर लैजानुपर्ने आवश्यकता छ । त्यो कामको सुरुवात भई नै सकेको छ ।’ दाहालले भने ।
भूकम्पको समयमा आउँदा गाउँमा पीडा देखेको स्मरण गर्दै उनले अहिले सबैमा प्रसन्नता, जोस र उमङ्ग आफूले पाएको बताए ।
