काठमाडौं, १४ जेठ ।
काठमाडौंको चन्द्रगिरी नगरपालिका निवासी महेन्द्र लामा ‘विक्रम’को घरमा प्रहरीले खानतलासी गरेको छ ।
आइतबारको चन्द्रगिरी बम विष्फोटमा परी घाइते भएका नेता लामाको शहिद मेमोरियल हस्पिटलमा कलंकीमा उपचार गराइरहेको अवस्थाकाबीच हिजो सोमबार दिउँसो थानकोटस्थित घरमा पुगेर प्रहरीले खानतलासी गरेको घरपरिवारले जनाएको छ । सादा पोशाकमा गएका प्रहरी टोलीले तलासी लिइएको हो ।
तलासीका क्रममा मानसिक यातना समेत दिइएको र त्यस क्षेत्रमा ने.क.पा.को गतिविधिबारे सोधिएको बताइएको छ । अनावश्यक रुपमा घरपरिवारलाई मानसिक रुपले तनाव दिएको र असम्बन्धित विषयमा केरकार गरेको भन्दै परिवारका एक सदस्यले आपत्ति जनाए । प्रहरी प्रशासनको उक्त हर्कत रोक्न पनि सरकारसँग उनले माग गरे ।
घाइते लामाको शरीरको दायाँपट्टिको शिरदेखि पैदलसम्मको पूरै भागमा चोट लागेको अस्पताल स्रोतले जनाएको छ । स्रोतका अनुसार लामाको दायाँ हातको तीन वटा औंला विष्फोटमा परी चुँडिएको छ । अर्का घाइते बुद्ध लामाको भने गम्भीर अवस्थाबीच उपचार भइरहेको बताइएको छ ।
सुकेधारा र घट्टेकुलोमा भएको विष्फोटको केही समयपछि नै चिन्द्रगिरी क्षेत्रमा विष्फोट भएको थियो । घाइते दुवै जना ने.क.पा.सँग आवद्ध रहेको बुझिएको छ ।
त्यस्तै घट्टेकुलोमा भएको विष्फोटका घाइते भई उपचाररार्थ रबिन केसीको स्वास्थ्य अवस्थामा खतरामुक्त रहेको पनि जनाइएको छ ।
