काठमाडौं, जेठ ८ ।
प्रतिनिधि सभाको बैठक आज बस्दै छ । दिउसो १ बजे पछि बस्ने बैठकबाट सरकारले अघिल्लो अधिवेशनमा प्रस्तुत गरेको तीन सहित ७ वटा विधेयक थप प्रक्रियामा लैजाने तयारी गरेको छ ।
समय अभावका कारण तेस्रो अधिवेशनबाट पारित हुन नसकेका जेष्ठ नागरिक पहिलो संशोधन, नागरिक लगानी कोष दोस्रो संशोधन र विज्ञापन नियमन गर्ने विधेयक चौंथो अधिवेशनको १३ औं बैठकबाट आज अघि बढ्न लागेको हो ।
आजको बैठकमा सम्बन्धित मन्त्रीहरुले ती विधेयकमाथि विचार गरियोस भन्ने प्रस्ताव प्रस्तुत गर्ने कार्यसूची छ । यस्तै, सरकारले गत सोमबार टेबुल गरेका थप चार वटा विधेयक पनि प्रक्रियामा लैजानेछ ।
प्रधानमन्त्रीका तर्फबाट अर्थमन्त्री युवराज खतिवडाले प्रस्तुत गर्नुभएको राजश्व चुहावट अनुसन्धान तथा नियन्त्रण पहिलो संशोधन, गृहमन्त्री रामबहादुर थापाले प्रहरी समायोजन र उद्योग, वाणिज्य तथा आपूर्तिमन्त्री मातृका यादवले औद्योगिक व्यवसाय विकास प्रतिष्ठान पहिलो संशोधन तथा औद्योगिक व्यवसाय विधेयक टेबुल गर्नुर्भएको थियो ।
ती चारै वटा विधेयकमा सम्बन्धित मन्त्रीले आज विचार गरियोस भन्ने प्रस्ताव प्रस्तुत गर्नुहुनेछ । सबै विधेयकमाथि सैद्धान्तिक छलफल हुनेछ ।
