बुढीतोला, २९ वैशाख । नेपाल पत्रकार महासंघ, सुदूरपश्चिम प्रदेश समितिको प्रथम साधारण सभाको मिति तय भएको छ ।
प्रदेश समितिको आइतबार गोदावरी नगरपालिका–३, बुढीतोलामा बसेको बैठकले असार ५ र ६ गते बैतडीमा प्रथम साधारणसभा गर्ने निर्णय गरेको हो । प्रदेश समितिका अध्यक्ष अर्जुन शाहले प्रदेश समिति, प्रदेश पार्षदहरु, जिल्ला शाखाहरुका पदाधिकारी समेत सहभागी हुने गरी बृहत रुपमा प्रदेशको प्रथम साधारण सभा गर्ने बताए ।
प्रदेश समितिको बैठकले केन्द्रीय समितिको सर्कुलर अनुसार बैशाख अन्तिमसम्म प्रदेश सबै सदस्यहरुलाई सदस्यता नविकरण गर्न अनुरोध पनि गरेको छ । केन्द्रीय समितिले बैशाख ३१ गतेभित्र दुई वर्षसम्मको सदस्यता नविकरण नगर्ने सदस्यको सदस्यता खारेज हुने र त्यसपछि परेका निवेदनमाथि कुनै सुनुवाई नहुने भनि सबै जिल्ला र प्रदेश समितिलाई सर्कुलर पठाएको छ । यसैगरी, निस्क्रिय भएका सदस्यहरुको सदस्यता नविकरण नगर्न र नगराउन समेत सर्कुलरमा उल्लेख छ ।
प्रदेश समितिले प्रदेशका नौ वटै जिल्ला शाखाहरुलाई नविकरण भएका डकुमेन्ट जेठ ७ गतेभित्र प्रदेश समितिमा पठाउन अनुरोध गर्ने निर्णय गरेको छ ।
यसका साथै प्रदेश समितिको बैठकले मिडिया काउन्सिल सम्बन्धी विधेयक २०७६ को विरोधमा घोषणा गरेको आन्दोलनलाई सुदूरपश्चिम प्रदेशका नौ वटै जिल्लामा सशक्त रुपमा सञ्चालन गर्ने निर्णय गरेको छ । प्रदेश समितिले प्रदेशका सबै पत्रकारहरुलाई सम्बन्धित जिल्ला शाखाले आयोजना गर्ने आन्दोलनको कार्यक्रममा सक्रियताका साथ सहभागी हुन आम पत्रकारहरुलाई आव्हान गरेको छ ।
प्रदेश समितिले प्रदेशका सबै सदस्यहरुको वैयक्तिक विवरण (पर्सनल प्रोफाइल) र सञ्चार माध्यमहरुको विस्तृत विवरण (मिडिया प्रोफाइल) तयार गर्ने फाराम समेत स्वीकृत गरी सो विवरण लिने कार्यलाई जिल्ला शाखाहरु मार्फत् तत्काल अगाडि बढाउने निर्णय गरेको छ । प्रदेश समितिको बैठकमा कैलाली कञ्चनपुरमा कार्यरत अग्रज पत्रकार र जिल्ला अध्यक्षहरुको समेत सहभागिता थियो ।
स्थानीय तहको सञ्चार नीति सम्बन्धी छलफल
स्थानीय तहको सञ्चार नीति सम्बन्धी प्रारम्भिक छलफल तथा अन्तरक्रिया कार्यक्रम आइतबार सम्पन्न भएको छ ।
गोदावरी नगरपालिकाको आर्थिक सहयोगमा नेपाल पत्रकार महासंघ, सुदूरपश्चिम प्रदेश समितिले आयोजना गरेको सो कार्यक्रम गोदावरी–४, बुढीतोलामा सम्पन्न भएको हो । कार्यक्रममा सहभागीले स्थानीय तहले सञ्चार नीति बनाउदा पत्रकार र सञ्चार माध्यमलाई प्रतिबन्ध लगाउने खालका बनाउन नहुने बताए । उनीहरुले स्थानीय पत्रकार र सञ्चार माध्यमको विकासमा सहयोग पुग्ने गरी स्थानीय तहहरुले सञ्चार नीति बनाउनुपर्ने बताए । उनीहरुले सञ्चार नीतिले स्थानीय तहहरुको विकास र गतिविधिमा पत्रकार र सञ्चार माध्यमहरुले सहयोग गर्न सक्ने गरी नीति बनाउनु पर्ने बताए ।
गोदावारीको वडा नं. ४ का अध्यक्ष तथा नगर कार्यपालिकाका विधायन समिति संयोजक प्रेमबहादुर भण्डारीले पत्रकारले स्थानीय तहका राम्रा र नराम्रा दुबै पक्षको बारेमा समाचार सम्प्रेषण गर्नुपर्ने बताए । यसले गर्दा स्थानीय तहहरुलाई कमकमजोरी सच्याउँदै विकास र समृद्धिका लागि काम गर्ने प्रेरणा मिल्ने बताए ।
पत्रकार महासंघ प्रदेश समितिका अध्यक्ष अर्जुन शाहको अध्यक्षतामा सम्पन्न कार्यक्रममा नेपाल पत्रकार महासघका पूर्वकेन्द्रीय सदस्य दिलबहादुर छत्याल, पत्रकार महासंघ कैलालीका पूर्व अध्यक्ष भरत शाह, कञ्चनपुरका पूर्व अध्यक्ष लक्ष्मण तिवारी, कैलालीका अध्यक्ष जगत साउँद, कञ्चनपुरका अध्यक्ष विष्णु अवस्थी, वानका उपमहासचिव गोविन्द रोस्यारा लगायतले स्थानीय तहको सञ्चार नीति सम्बन्धी धारणा राखेका थिए । महासचिव योगेश रावलले सञ्चालन गरेको कार्यक्रममा पत्रकार महासंघका प्रदेश समितिका पदाधिकारी तथा सदस्य लगायत सुदूरपश्चिमका नौ जिल्लाका पत्रकारहरुको सहभागिता थियो ।
