पाल्पा, १६वैशाख । बेहुली लिएर फर्किर्दै गरेको जिप पाल्पामा दुर्घटना हुँदा पाँच जनाको मृत्यु भएको छ। मृत्यु हुनेमा निस्दी ७ का ४५ वर्षीय खड्गबहादुर सोमै, सोही स्थानका ५५ वर्षीय देवीलाल खन्गाह, ४५ वर्षीय लालबहादुर सारु, ५७ वर्षीय सन्तबहादुर सारु र चालक बुद्धिबल सोती रहेका छन् ।
इलाका प्रहरी कार्यालय रामपुरका प्रमुख प्रहरी निरीक्षक भूपालसिंह रानाका अनुसार भिरपानीमा विवाह सकेर बेहुली लिएर फर्किर्दै गरेको लु १ ज १९४१ नम्बरको जिप दुर्घटना हुँदा घटनास्थलमै पाँच जनाको मृत्यु भएको हो। पाल्पाको निस्दी गाउँपालिका ७ हुवासबाट जन्ती लिएर जिप भिरपानी पुगेको थियो।
जिप अनियन्त्रित भइ सडकबाट करिब चार सय मिटर तल खसेको प्रहरीको भनाइ छ। जिप अनियन्त्रित भएपछि बेहुला-बेहुली र अन्य जन्तीले भने हाम फालेर ज्यान जोगाएका छन्। दुर्घटनास्थल सदरमुकाम तानसेनबाट करिब ७० किलोमिटर टाढा पर्छ।
