काठमाडौं, चैत २९ ।
नेपाल विद्युत प्राधिकरणले गएको आर्थिक वर्षमा २ अर्ब ८४ करोडभन्दा बढी रुपैयाँ नाफा गरेको छ ।
महालेखापरीक्षक कार्यालयको लेखापरीक्षण प्रतिवेदनअनुसार कार्यकारी निर्देशक कुलमान घिसिङको नेतृत्वमा प्राधिकरणले गत आर्थिक वर्ष २०७४/७५मा २ अर्ब ८४ करोड ८१ लाख रुपैयाँ खुद नाफा कमाउन सफल भएको हो ।
गत वर्षको तुलनामा बिक्रीमा खुद नाफा र चालु सम्पत्तिमा दायित्व अनुपात बढेको तथा ऋणको अनुपात, कुल खर्चमा कर्मचारी खर्च अनुपात र वितरण नोक्सान घटेको भन्दै महालेखाले विगतको तुलनामा प्राधिकरणको वित्तीय अवस्था सुधारोन्मुख देखिएको जनाएको हो ।
घिसिङ आफैले आर्थिक वर्ष २०७४/७५मा १ अर्ब १ करोड रुपैयाँ नाफा आर्जन हुने प्रक्षेपण गरेकामा महालेखाको परीक्षणमा भने प्राधिकरणको खुद नाफा २ अर्ब ८४ करोड ८१ लाख रुपैयाँ देखिएको हो ।
जगेडा तथा संचित कोषतर्फ भने २३ अर्ब ५९ करोड ७९ लाख रुपैयाँ ऋणात्मक आव २०७२/७३मा भने यो रकम २६ अर्ब ३३ करोड ४८ लाख रुपैयाँ ऋणात्मक थियो ।
८ अर्ब ८९ करोड खुद नोक्सानीमा रहेका बेलामा घिसिङ २०७३ भदौमा प्राधिकरणमा कार्यकारी निर्देशक बनेर गएका थिए ।
प्राधिकरणमा आएपछि मुलुकमा लोडसेडिङ अन्त्यका साथै संस्थाको आर्थिक जीवनमा पनि सुधार देखिएको छ ।
