१ चैत, काठमाडौं ।
२०७६ सालको तोयनाथ पञ्चाङ्ग पात्रो अनुसार असोज १२ गतेबाट नेपालीहरुको महान चाड बडा दशैं सुरु हुने छ । उक्त पत्रो अनुसार २०७६ सालको दशैंको टीका असोज २१ गते परेको छ । भने तिहारको भाइटीका र गोवर्धन पूजा एकैदिन कात्तिक १२ गते परेको छ ।
यस्तै साउन २० गते नागपञ्चमी र ३० गते रक्षा बन्धन अर्थात जनैपूर्णिमा र भदौ २६ गते हरितालिका तीज परेको छ ।
असोज १२ गतेबाट बडा दशैं सुरु हुने भएकोमा १८ गते शनिबारको दिन फूलपाती र २१ गते मंगलबार टीका तथा २६ गते आइतबार कोजाग्रत पूर्णिमा छ ।
यस्तै कात्तिक ८ गतेबाट दोस्रो ठूलो चाड तिहार सुरु हुने छ । कात्तिक ८ गते यमदीप दान गरेपछि ९ गते शनिबार काग तिहार, १० गते कुकुर तिहार, ११ गते लक्ष्मी पूजा परेको छ ।
१२ गते गोवद्र्धन पूजा र भाइटीका एकैदिन परेको छ । तोयनाथ पञ्चाङ्ग पात्रोका प्रकाशक सूर्यनाथ पन्तले अनलाइनखबरसँग भने, ‘२०७६ सालमा गोवद्र्धन पूजा र भाइटीका जुधेको छ । कतिबेला गोवद्र्धन पूजा गर्ने र कतिबेला भाइटीका लगाउने भन्ने कुरा चाहिँ पञ्चाङ्ग निर्णायक समितिले सार्वजनिक गर्छ ।’
२०७६ सालको कात्तिक १६ गते छठ पर्व परेको छ । यस्तै फागुन ९ गते महाशिवरात्री र २६ गते होली पूर्णिमा परेको छ ।
