कैलाली, ३० फागुन ।
नेपाल कम्युनिस्ट पार्टीले आह्वान गरेको नेपाल बन्दका क्रममा बिहिवार बन्दकाे अवज्ञा गरेकाे भन्दै कैलालीको बडैपुरमा यात्रुवहाक बसमाथि आगजनी भएको छ । ।
पूर्वबाट पश्चिमतर्फ आइरहेको म १ ख ४४१ नम्बरको बसमा आगजनी भएको प्रहरीले जनाएको छ ।
गाडीमा सवार यात्रुलाई ओरालेर आगजनी गरिएको ईलाका प्रहरी कार्यालय मसुरियाले जनाएको छ । आगजनीबाट बस पूर्ण रुपमा क्षति भएको छ ।
सुदूरपश्चिम प्रदेशको पहाडी जिल्लाहरुलाई तराई जोड्ने भीमदत्त राजमार्गको गोदावरी सडक खण्डमा गाडि चलाउन रोक लगाउने कार्य गरेको भन्दै तीन जनालाई नियन्त्रणमा लिएको जिल्ला प्रहरी कार्यालय कैलालीका प्रहरी उपरीक्षक आभूषण तिमिल्सेना जानकारी दिए ।
सरकारले विप्लव नेतृत्वको ने.क.पा.लाई प्रतिबन्ध लगाएसँगै प्रहरीले उक्त पार्टीका नेता कार्यकर्तामाथि निगरानी र धरपकड बढाउन थालेको छ ।
सरकारकोे दमन, सेना परिचालन, गोलीकाण्ड र ज्यादाति रोक्न, देशभरबाट गिरफ्तार आफ्ना नेता कार्यकर्तामाथि चलाएको अमानवीय यातना र झुठा मुद्दाविरुद्ध पूर्वघोषित कार्यक्रम अनुरुप नै आज ने.क.पा.ले नेपाल बन्द गरेको हो ।
बन्दलाई लक्षित गरेर सुरक्षा व्यवस्था कडा पारिएको कैलाली प्रहरीले जनाएको छ ।
