कालिकोट, २७ फागुन ।
ने.क.पा.ले नेपाल बन्द नजिकँदै गर्दा गतिविधिलाई पनि बढाउँदै लगेको छ । शान्तिपूर्ण कार्यक्रम समेत गर्न नदिई आफ्ना नेता कार्यकर्तामाथि सरकारले दमन, धरपकड र झुठा मुद्दा लगाएको भन्दै विरोधस्वरुप आउँदो फागुन ३० गतेका लागि घोषित नेपाल बन्द लक्षित ने.क.पा.ले देशभर राजनीतिक गतिविधि बढाएको हो ।
सोही क्रममा आजै कालिकोटको नरहरिनाथ गाउँपालिकाको मालकोटस्थित नन्दीदेवी मावि सेरापाटामा ने.क.पा.को एरिया कमिटीले विशेष कोणसभा गरेको छ । सभाका प्रमुख वक्ता एरिया ईन्चार्ज कमल बटाला ‘धरातल’ले सरकारले शान्तिपूर्ण राजनीतिक गतिविधि समेत गर्न नदिई फासीवादी बनेको भन्दै उसको विनाशको यात्रा शुरु भएको बताए । ३० गतेको बन्द सरकारको अत्याचार, दमन र झुठा मुद्दाविरुद्ध भएकोले स्वतन्त्रपूर्वक र शान्तिपूर्ण राजनीतिक कार्यक्रम गर्न पाउने अधिकारको रक्षाको लागि भएकोले सफल बनाउन स्थानीयसँग आग्रह गरे । बटाला ने.क.पा.को जिल्ला सचिवालय सदस्य समेत हुन् ।
गोरख विक संचालन गरेको उक्त कोणसभामा स्थानीयहरुको उपस्थिति रहेको थियो । वक्ताहरुले ‘सरकारी नेकपा’ले गाउँटोलमा जनतालाई दुःख दिएको र स्थानीय तहमा प्रतिनिधिहरुले ठेकेदा र विचौलियासँग मिलेर बजेट दुरपयोग गर्ने र चरम भ्रष्टचार गर्ने गरिएको बताउँदै तिनलाई ठेगान जनताले लगाउने काम शुरु भएको समेत बताए ।
नेता कार्यकर्तामाथि सरकारले अनाहकमा दमन र गिरफ्तार गरेर झुठा मुद्दा लगाएको र फासीवादतर्फ उन्मुख भएको भन्दै रोक्नका लागि विरोधस्वरुप ने.क.पा.का महासचिव विप्लवले ३० गतेलाई नेपाल बन्दको घोषणा गरेका छन् ।
सरकारले पछिल्लो चरणमा कोशी ब्यूरो सदस्य एवं मोरङ–धनकुटा ईन्चार्ज देवकुमार लिम्बू ‘संगीत, अखिल नेपाल महिला संघ क्रान्तिकारीकी केन्द्रीय अध्यक्ष बन्धु चन्द, अखिल नेपाल किसान महासंघका केन्द्रीय संयोजक राजु कार्की, युवा संगठनका सूर्य भुजेल, केदार खतिवडा, गुल्मीका सेक्रेटरी खिमबहादुर खडका, दुर्गाबहादुर रोकालगायत ५० भन्दा बढी नेता कार्यकर्ताहरुलाई गिरफ्तार गरी हिरासतमा राख्दै आएको छ । दर्जनौंलाई विभिन्न अभियोगमा जेल पठाइएको छ ।
घोषित कार्यक्रम अनुसार सोमबार प्रचारप्रसार रहेको छ । भोलि २७ गते पनि देशैभर कोणसभा गर्ने, २८ गते र्याली र २९ गते साँझ मशाल जुलुस गर्नेछ ।
