सर्लाही, १ फागुन ।
नेपाल कम्युनिस्ट पार्टीको पूर्वी कमाण्डले आज सर्लाहीमा भव्यरुपमा २४औं जनयुद्ध दिवस मनाएको छ । जनकपुर ब्यूरोको आयोजना र मधेसी राष्ट्रिय मुक्ति मोर्चाको सहआयोजनामा जिल्लाको ईश्वरपुर नपा–६ सर्लाहीको बयलवास बजारमा दिवसको अवसरमा विशाल जनसभा सम्पन्न भएको हो ।
जनसभाका प्रमुख अतिथि नेपाल कम्युनिस्ट पार्टीका केन्द्रीय सदस्य एवं मधेसी राष्ट्रिय मुक्ति मोर्चाका केन्द्रीय अध्यक्ष देवनारायण साहले दलाल संसदीय व्यवस्थाबाट मुलुक र नागरिकको समस्या समाधान नहुने बताए । नेता साहले तराई क्षेत्रबाट दलाल र भ्रष्टचारीलाई तह लगाइ छाड्ने बताउँदै एकीकृत जनक्रान्तिको महाअभियानमा सामेल भएर आफ्नो सत्ता आफैं खडा गर्न लामवद्ध हुन जनसभामा अपिल गरे ।
पूर्वीकमाण्डले आफ्नो भूगोल क्षेत्रभित्र सर्लाही र इलाममा मात्र खुला कार्यक्रम आयोजना गरेको थियो । बयलवासको जनसभामा विशेष अतिथिको रुपमा नेकपाका केन्द्रीय सदस्य निर्मल तथा अतिथिहरुमा सर्लाही जिल्ला ईन्चार्ज कुमार पौडेल, महोत्तरी जिल्ला ईन्चार्ज रुपेश, ब्यूरो सदस्य पवन लगायतको उपस्थिति रहेको थियो ।
विशेष अतिथि निर्मलले प्रचण्ड–बाबुरामले अलपत्र छाडेका अधुरो क्रान्ति पुरा गर्न नेकपाको नेतृत्वमा एकीकृत जनक्रान्तिको कार्यादिशासहित सडकबाट क्रान्तिको झण्डा बोकेर क्रान्तिको यात्रामा अघि बढेको बताए । जनताको आफ्नै सत्ता वैज्ञानिक समाजवाद लागू नभएसम्म जनता र राष्ट्रको मुक्ति हुन नसक्ने प्रष्ट पारे ।
अतिथिहरुले महान जनयुद्धको २४औ. वर्षगाँठमा नेपाली जनता होमिरहेको बेला दस वर्षे जनयुद्धका तत्कालीन नेतृत्व प्रचण्ड शहरका होटल र कालो सिसाभित्रका कार्यालयमा गुलियो मिठाइ खाँदै रमाइरहेको बताउँदै। जनतालाई धोका दिएर मिठाइ खानेहरुलाई जनताले छुट नदिने र क्रान्तिको ज्वाराभाटाले डामेरै छाड्ने बताए ।
कमाण्डका अन्य जिल्लाहरुमा समेत विभिन्न कार्यक्रम गरी २४औं महान जनयुद्ध दिवस मनाएको पार्टी पिविएम तथा पूर्वी कमाण्ड ईन्चार्ज अनिल शर्मा ‘विरही’ले जानकारी दिए ।
जनसभालाई स्वागत अखिल नेपाल महिला संघ क्रान्तिकारीकी केन्द्रीय सदस्य प्रमिला थिङले गरेकी थिइन् । कार्यक्रम संचालन संचालन पदम सुनवारले गरेका थिए । विभिन्न जबसका नेताकार्यकर्ता तथा स्थानीय जनताको विशेष सहभागितामा भएको र्यालीपछि जनसभा भएको थियो ।
जनसभापछि आजै मधेसी राष्ट्रिय मुक्ति मोर्चाको सर्लाही जिल्ला कार्यसमिति चयन भएको छ । बुधबार सम्पन्न भेलाले ३५ सदस्यीय जिल्ला कार्यसमिति चयन गरेको जानकारी दिइएको छ ।
