नुवाकाेट, २२ माघ ।
संयुक्त राष्ट्रसंघीय विकास कार्यक्रम (यूएनडीपी) का कर्मचारी चढेको टाट सुमाे नुवाकाेटमा दुर्घटनामा परेकेा छ । बा ३ च ५७११ नम्बरको टाटा सुमो नुवाकोटको पूर्वी भेगमा रहेको थप्रेकमा मंगलबार बेलुकी दुर्घटना भएकाे जिल्ला प्रहरी कार्यालय नुवाकोटका प्रमुख तथा प्रहरी उपरीक्षक कृष्णबहादुर पल्लिमगर जानकारी दिएका छन् ।
दुर्घटनामा परि चालकको घटनास्थलमै ज्यान गएको छ भने पाँचजना घाइते भएका छन् । घाइतेमध्ये दुई जनाको अवस्था गम्भीर छ ।
मृत्यु हुनेमा चालक सर्लाहीका २४ वर्षीय सुमन बुढाथोकी रहेका छन्को । घाइतेको नाम मंगलबार अबेरसम्म खुलेको छैन । गाडी सदरमुकाम विदुरदेखि ३५ किलोमिटर पूर्वमा रहेको पञ्चकन्या गाउँपालिका–४ थप्रेकस्थित आरुखर्ककाे कच्ची सडकबाट एक सय ५० मिटर तल खसेको छ ।
थप्रेकमा युएनडीपीको सहयोगमा निर्माण भई रहेको स्वास्थ्य चौकीको निरीक्षण गर्न कर्मचारी बट्टारबाट गाडी भाडामा लिएर गएका थिए । दुर्घटनाअघि उक्त गाडी घ्याङफेदी पुगेर सातविसे हुँदै आरुखर्क जाँदै गरेको थियो । दुर्घटनालगत्तै स्थानीयवासीले घाइतेको उद्धार गरेका थिए ।
