काठमाडौं,माघ १३ ।
डा. गोविन्द केसीको उपचारमा संलग्न चिकित्सकले अनशनरत केसीको स्वास्थ्य जटिल बन्दै गएको बताएका छन् । डा. केसीको स्वास्थ्य अवस्था निरन्तर खस्किँदो अवस्थामा रहेको र शरीरमा सेता रक्त कोषको मात्रा पनि कम रहेको उपचारमा संलग्न डा. सुवास आचार्यले बताउनुभयो । लामो समयदेखि डा. केसीका पेट खाली रहेकाले सेता रक्त कोषको मात्रा कम हुँदै गएको उनले जानकारी दिनुभयो ।
डा. केसीलाई संक्रमणको उच्च जोखिम रहेकाले चिकित्सकले निरन्तर निगरानीमा राखेको डा. आचार्यले बताए। उनका अनुसार डा. केसीको स्वास्थ्यमा कुनै पनि बेला गम्भीर समस्या निम्तिने खतरा छ । डा. केसी पुस २५ देखि अनशनमा छन्।
यसैबीच नेपाल चिकित्सक संघले डा. गोविन्द केसीको जीवन रक्षाका साथै माग पूरा गराउन सरकारलाई दबाब दिने उद्देश्यले आन्दोलनको तयारी गरेको छ । यसका लागि संघले आज बृहत् भेला आयोजना गरेको छ ।
