कञ्चनपुर, माघ ११।
कञ्चनपुरकी १३ बर्षीया बालिका निर्मला पन्तको बलात्कारपछि हत्या भएको ६ महिना पुरा भएको छ । हत्यारा अझै पत्ता लाग्न सकेको छैन । प्रहरीले भने अनुसन्धानका विभिन्न पाटाका बारेमा अध्ययन भइरहेको जनाएको छ ।
गत साउन १० गते साथीको घरमा गृहकार्य गर्न गएकी कञ्चनपुरकी १३ वर्षीया बालिका निर्मला पन्तको बलात्कारपछि हत्या भएको छ महिना पुरा भएको छ । उनकोे ११ गते बलात्कारपछि हत्या गरिएको अवस्थामा नजिकैको उखुबारीमा शव फेला परेको थियो । यसबीचमा घटनाको अनुसन्धानका लागि सिआइबीका ३ र एसपि दुर्गा सिंह नेतृत्वको टोलीसहित आधा दर्जन टोलीले अनुसन्धान गरिसके तर ठोस उपलब्धि भने शून्यजस्तै छ ।
अनुसन्धानका लागि अन्य कुनै प्रमाण फेला पार्न नसकेको प्रहरीले पछिल्लो समय डीएनए परीक्षणलाई अनुसन्धानको सूत्र बनाएको छ । यता तीन महिनाभित्र सरकारी वकिलको कार्यालयमा प्रतिवेदन पेश गर्नुपर्ने भएकाले धेरै कामहरु भइसकेको कञ्चनपुरका प्रहरी प्रमुख कुवेर कडायतले जानकारी दिनुभयो ।
सरकारी वकिलको कार्यालयमा प्रतिवेदन पेश भएपछि पनि मुद्दा अगाडी बढ्ने नबढ्ने बारे बताउन नसकिने प्रहरीको भनाई छ । अर्कोतिर प्रहरीले निर्मलाको छिमेकीकै डिएनए परीक्षण गर्न थालेपछि पीडित पक्ष र छिमेकीको सम्बन्ध पनि चिसिएको छ ।
