रामेछाप, ६ माघ ।
मन्थली नगरपालिका–१ मच्छेडाँडीमा आइतबार दिउँसो एक यात्रुबाहक बस दुर्घटना हुँदा दुईजना यात्रुको ज्यान गएको छ ।
ओखलढुङ्गाको घोराखोरीबाट काठमाडौंतर्फ गइरहेको बा४ख४२१० नम्बर अरनिको यातायातको यात्रुवाहक बस सुपर एक्सप्रेस दुर्घटना हुँदा दुई जनाको ज्यान गएको हो ।
दुर्घटनमा गम्भीर घाइते भएका निरोज भुजेलको उपचारका लागि काठमाडौं लैजाने क्रममा बाटोमा नै निधन भएको हो भने अर्को यात्रु ओखलढुङ्गा जिल्ला फुलबारीका वर्ष ३६ का ओम कार्कीको मृत्यु दुर्घटनास्थलमै मृत्यु भएको हो । दुर्घटना ब्रेक फेलबाट भएको प्रारम्भिक अनुसन्धानमा खुलेको जिल्ला प्रहरी कार्यालय रामेछापले जनाएको छ । दुर्घटनामा परी १७ जना घाइते भएका छन् । त्यसमध्ये ३ जनाको अवस्था गम्भीर रहेको जनाइएको छ ।
घाइते हुनेहरुमा रामेछापका गौतम भुजेल, नारायण कार्की, सरोज कार्की, भक्तबहादुर भुजेल, इश्वरी महत, युनिषा भुजेल, अजय भुजेल, ओखलढुङ्गाका नवराज पाण्डे, खड्ग भुजेल, मिलन गुभाजु, चिनामाया माझी, अर्जुन तामाङ बर्दिया जिल्ला घर भएका भोलाराम थारु, बलदेव थारु लगायत छन् ।
घाइतेहरुको अहिले सदरमुकाम मन्थलीस्थित तामाकोसी सहकारी अस्पतालमा उपचार भइरहेको जनाइएको छ । बस ओरालो कालोपत्रे सडकमा गुडिरहेको अवस्थामा दुर्घटना भएको थियो ।
