आफुलाई लिटल बुद्ध बताउने रामबहादुर बम्जन को सिन्धुपाल्चोक स्थित बाडेगाउँमा रहेको आश्रममा प्रहरीले छापा मारेको छ। काठमाडौंबाट खटिएको केन्द्रीय अनुसन्धान ब्युरो (सिआइबी) र सिन्धुपाल्चोक प्रहरी टोलीले शुक्रबार आश्रममा छापा मारेको हो।
बम्जनका विभिन्न स्थानमा रहेका आश्रमबाट ४ जना वेपत्ता भएका र एक जनाको हत्या समेत भएको खवर सार्वजनिक भएपछि सिआएबीले अनुसन्धान थालेको र सोहि क्रममा सिन्धुपाल्चोकमा रहेको आश्रममा प्रहरीले छापा मारेको हो।
सिन्धुपाल्चोकका प्रहरी प्रमुख मुकुन्द मरासिनीले बाडेगाउँमा रहेको आश्रममा छापा मारेको पुष्टि गर्दै केहि विषयहरुमा अनुसन्धान गनुपर्ने भएकाले सिआइबीको टोली सिन्धुपाल्चोक आएको बताए। प्रमुख मरासिनीले भने टोली कुन विषयका लागि अनुसन्धानकाे क्रममा आएको हो त्यो भने खुलाएनन्। आश्रम अहिले प्रहरी नियन्त्रण रहेको छ। अनुसन्धान पुरा नभएसम्म प्रहरीले आश्रमलाई आफ्नो नियन्त्रणमा राख्ने मरासिनीले बताए।
