काठमाडौं, १३ पुस ।
अखिल (क्रान्तिकारी)ले ‘कम्युनिस्ट विद्यार्थी अभियान–२०७५’ देशैभर तीव्रता दिइरहेको छ । यो अभियानका क्रममा गाउँगाउँमा पुगेर विद्यार्थी, अभिभावक तथा स्थानीयसँग भेट गरेर वर्तमान सरकारको शैक्षिक क्षेत्रमा व्यापारिकरण र निजीकरणबारे भण्डफोर कार्यक्रमलाई व्यापक बनाउँदै लगेको छ । सोहीबीच उसले स्थानीयसँग विभिन्न काममा सघाउने र श्रम समेत गरेको छ ।
यसैबीच अखिल (क्रान्तिकारी)को पूर्वी ताम्सालिङ ब्यूरोले शुक्रबार सिन्धुपाल्चोक जिल्लाका विभिन्न क्षेत्रमा पुगेर विद्यार्थी नेताहरुले किसानलाई मल बाकेर सघाएका छन् । दिउँसोभर उनीहरुले किसानको मल घरदेखि बोकेर टाढाटाढा खेतबारीमा पुर्याएका छन् ।
ब्यूरो ईन्चार्ज मुकुन्द श्रेष्ठ नेतृत्वको टोलीले जिल्लाको पाङताङ क्षेत्रका किसानलाई आज मल बोकेर सघाएको छ । यो अभियान पूर्वीताम्सालिङको चार जिल्ला रामेछाप, सिन्धुपाल्चोक, काभ्रेपलाञ्चोक र दोलखामा जारी रहेको ईन्चार्ज श्रेष्ठले जानकारी दिएका छन् ।
अखिल (क्रान्तिकारी)को मातृ पार्टी नेपाल कम्युनिष्ट पार्टीले भने देशैभर ‘कम्युनिस्ट पार्टी अभियान’ चलाइरहेको छ ।
