काठमाडौं ६ पुस ।
अर्थमन्त्री डाक्टर युवराज खतिवडाले इजाजतबिना नै भुक्तानीसम्बन्धी कारोबार गर्नेमाथि कडा कारबाही गर्ने चेतावनी दिनु भएको छ ।
अर्थमन्त्री खतिवडाले अनलाइन सेवाबाट भुक्तानी गर्न नेपाल राष्ट्र बैंकको नियमनकारी निकायमा आवद्ध हुन पनि व्यवसायीहरुलाई सचेत गराउनुभयो ।
आज संघीय संसद प्रतिनिधिसभा अन्तरगतको अर्थ समितिको बैठकमा ‘भुक्तानी तथा फस्र्यौट सम्बन्धमा व्यवस्था गर्न बनेको विधेयक–२०७५’ माथिको छलफलमा भाग लिँदै उहाँले विदेशी मुद्रालाई अपचलन हुन नदिन पनि सरकारले सो विधेयक ल्याउनु परेको स्पष्ट पार्नुभएको हो ।
मन्त्री खतिवडाले भुक्तानीमा जालसाँची हुन नदिन सरकारले नेपाल राष्ट्र बैंकका गभर्नरको अध्यक्षतामा समिति नै गठन गरेको पनि स्मरण गराउनुभयो । उहाँले विद्युतीय भुक्तानी प्रणालीलाई व्यवस्थित बनाउन पनि सरकारले त्यस सम्बन्धी बैकिङ प्रणालीको विकास गर्न लागिरहेको जानकारी दिनुभयो ।
अर्थमन्त्री खतिवडाले अनलाइन भुक्तानी प्रणालीलाई व्यवस्थित बनाउन पनि सरकारले सोसम्बन्धी कानुन निर्माणको कामलाई अघि बढाएको पनि स्पष्ट पार्नुभएको छ ।
