काठमाडौं, मंसिर २४ ।
आज अन्तराष्ट्रिय मानव अधिकार दिवस, नेपालमा पनि विभिन्न जनचेतनामूलक कार्यक्रमको आयोजना गरि मनाइदै छ ।
सन् १९४८ डिसेम्बर १० तारीखका दिन संयूक्त राष्ट्रसंघको महासभाले मानव अधिकारको बिश्वब्यापी घोषणा गरेको दिनलाई अन्तराष्ट्रिय मानव अधिकार दिवसको रुपमा मनाउँदै आईएको छ ।
नेपाल संयुक्त राष्ट्रसंघले सदस्य राष्ट्र भएका नाताले पनि नेपालले पनि बिश्वले झै डिसेम्बर १० लाई अन्तराष्ट्रिय मानव अधिकार दिवसको रुपमा देशैभर मनाउँदै आईरहेको छ ।
दिवसको अवसरमा मानवअधिकारको क्षेत्रमा क्रियाशील गैरसरकारी संघसंस्थाले विभिन्न कार्यक्रम आयोजना गरेका छन् ।
यसैबीच दिवसको अवसरमा प्रधानमन्त्री केपी शर्मा ओली शुभकामना सन्देश जारी गर्दै मानव अधिकार र सङ्क्रमणकालीन न्यायको विषयलाई सरकारले प्राथमिकतामा राखेकाले द्वन्द्वपीडितलाई न्यायको अनुभूति गराउन सरकार प्रतिबद्ध रहेको बताउनु भएको छ ।
उहाँले मानवअधिकार उल्लंघन हुन नदिन, मानवअधिकार उल्लघंनका दोषीलाई कानुनको दायरामा ल्याउन र पीडितलाई क्षतिपूर्ति र न्याय दिलाउन पनि उत्तिकै सजग रहेको उल्लेख गर्नु भयो ।
‘सरकार राष्ट्रिय मानवअधिकार आयोगलगायतका संवैधानिक आयोगहरु, संयुक्त राष्ट्र संघका निकाय, गैरसरकारी संस्था तथा नागरिक समाजसँग समन्वय कायम गर्दै अघि बढिरहेको छ’ शुभकामना सन्देशमा भनिएको छ ।
मानवअधिकार र संक्रमणकालीन न्यायको विषयलाई सरकारले प्राथमिकतामा राखेको उल्लेख गर्दै प्रधानमन्त्रीले द्वन्द्व पीडितलाई न्यायको अनुभूति गराउन सरकार प्रतिबद्ध रहेको बताउनुभयो ।
प्रधानमन्त्री ओलीले सरकार संघीय लोकतान्त्रिक गणतन्त्रलाई सुदृढ तुल्याउँदै सुशासन र विकासको बाटो हुँदै समृद्ध नेपाल, सुखी नेपालीको राष्ट्रिय आकांक्षा पूरा गर्नेतर्फ अग्रसर भइरहेका बेला पनि मानवअधिकार दिवसले हामीमा अझ नयाँ उत्साह र ऊर्जाको सञ्चार गरिरहेको बताउनुभएको छ ।
