२१ मंसिर, काठमाडौं ।प्रहरीले इटहरीमा डकौती गरेर भागेका राजन लिम्बुलाई काठमाडौंको रातोपुलमा बाट पक्राउ गरेकेा छ । लिम्बुलाई महानगरीय अपराध अनुसन्धान महाशाखाको टोलीले गोली प्रहार गरेर पक्राउ गरेको हो । उनको खुट्टामा गोली लागेको छ । वीर हस्पिटलको ट्रमा सेन्टरमा उनको उपचार भइरहेको प्रहरीले जनाएको छ ।
पक्राउ गर्ने क्रममा भाग्न खोजेपछि गोली चलाउनु परेको दाबी गर्दै प्रहरीले उनकाे साथमा हतियार समेत रहेकेा जनाएकाे छ ।
६ वर्ष जेल बसेर छुटेका उनको साथबाट चाइनिज पेस्तोल र चार राउण्ड गोली भेटिएको प्रहरीको दाबी छ ।लिम्बुले पछिल्लो समय इटहरीमा रहेको एक्टिभ मनी ट्रान्फरका सञ्चालक सबिन दाहाललाई छुरा प्रहार गरेर ३ लाख रुपैयाँ लुटेका थिए ।
लिम्बुको घर पनि इटहरीमै छ । त्यसअघि ०६३ सालमा उनले रोयल कोअपरेटिभ लिमिटेडको कार्यालयमा प्रवेश गरेर ११ लाख ३० हजार रुपैयाँ लुटिएको घटनामा पनि संलग्न भएको प्रहरीको भनाइ छ । उनले त्यतिवेला पेस्तोल देखाएर लुटपाट गरेका थिए ।
उनको साथबाट एउटा चाइनिज पेस्तोल र चार राउण्ड गोली समेत बरामद भएको महाशाखाका प्रमुख एसएसपी धिरजप्रताप सिंहले बताए ।लिम्बु ६ वटा घटानमा संलग्न रही प्रहरीको वान्टेड सूचीमा रहेको बताएका छन् ।
