काठमाडाैं, १९ मंसिर ।
ईङ्लीस प्रिमियर लिग फुटबलमा आज ६ खेल हुदैछन् । दोस्रो स्थानको लिभरपुलले बर्नलीसंग प्रतिस्पर्धा गर्नेछ ।
अपराजित रहेको अर्को टोली लिभरपुल आजको खेलमा समेत जित निकाल्दै म्यान सिटीसंगको दुरी छोट्याउने दाउमा छ ।
तेस्रो स्थानको चेल्सी, वोल्भरहेम्प्टनविरुद्ध मैदान उत्रदा चौथो स्थानको आर्सनलले २२ अंकमा आठौं स्थानमा रहेको म्यानचेष्टर युनाईटेडसँग प्रतिस्पर्धा गर्नेछ ।
आर्सनलसँग समान ३० अंक भएरपनि गोल अन्तरमा पांचौ स्थानमा रहेको टटनहामले साउथहेम्प्टसँग प्रतिस्पर्धा गर्दा फुलहाम र लेष्टर सिटी तथा एभर्टन र न्युक्यासल युनाईटेडपनि आमने सामने हुनेछन् ।
यसअघि भएकाे खेलमा म्यानचेष्टर सिटीले वाटफोर्टलाई २–१ ले हराउदै सिटीले जारी सिजन लिगमा १३ औं जित निकालेको छ ।
२ खेलमा बराबरी गरेको सिटीको ४१ अंक भएको छ । जारी सिजन अपराजित अर्को टोली लिभरपुल ३६ अंकमा तालिकाको दोस्रो स्थानमा छ ।
सिटीको जितमा गएराती लेरो साने र रियाद मारेजले गोल गरे । ८५ औं मिनेटमा गोल गर्दै वाटफोर्टले गोल अन्तर घटाएको थियो । हारले वार्टफोर्ट २० अंकमा तालिकाको ११ औं स्थानमा झरेको छ ।
गएरातीनै बर्नमाउथले हर्डसफिल्ड टाउनलाई २–१ ले पराजित गर्यो । लगातार ४ खेलमा पराजित भएको बर्नमाउथ पाचौं खेलमा जित निकाल्दै २३ अंकमा छैठौं स्थानमा पुगेको छ । हर्डल्सफिल्ड भने रेलिगेशन जोनबाट एक स्थानमात्र माथि, १७ औं स्थानमा छ । बेष्टहामले कार्डिफ सिटीलाई ३–१ ले स्तब्ध पार्यो । जितसंगै वेष्टहाम १८ अंकसहित तालिकाको १२ औं स्थानमा उक्लिएको छ ।
अर्को खेलमा ब्राईटन एण्ड होभ एल्बियनले क्रिष्टल प्यालेसलाई ३–१ ले पराजित गर्यो । क्रिष्टलविरुद्धको जितले ब्राईटनलाई दशौं स्थानमा पुर्याएको छ ।
