काठमाडौं, ५ मंसिर ।
गृहमन्त्री रामबहादुर थापा ‘बादल’माथि पूर्वलडाकूले आक्रोश पोखेका छन् । शान्ति प्रक्रिया सुरुवातसँगै अस्थायी शिविरमा राखिएका बेला बादल आवद्ध माओवादी पार्टीकै सरकारको पालामा अयोग्य ठहर्याएर घर फर्काइएका पूर्वलडाकू (तत्कालीन जनमुक्ति सेना)का एक सदस्य कुलप्रसाद भट्टराईले बादलकै अगाडि विष सेवन गरेर आक्रोश पोखेका छन् ।
भट्टराई गृहमन्त्रीलाई भेट्न बुधबार दिउँसो कार्यालय समयमा सिंहदरबार पुगेका थिए । मन्त्रालयमा गृहमन्त्रीसँग कुराकानी गरिरहेका बेला उनले एक्कासी खल्तीबाट विषको भाँडा झिकेर खाएका थिए । तत्काल सुरक्षा मिलेपछि पूरै विष सेवन गर्न नपाएको र त्यसलगत्तै उपचारका वीर अस्पताल लगिएको थियो ।
हाल वीरमा उपचार गराइरहेको जनाइएको छ । प्रचण्ड–बादल सरकारको बागडोर सम्हाल्ने ठाउँमा पुग्दा पनि आफूहरुको अपमान खारेजबारे ठोस निर्णय नगरेको भन्दै पूर्वलडाकुहरुले आक्रोश पोख्दै आइरहेको बेला यो घटना भएको छ । देशभर गरी हाल पाँच हजारको हाराहारीमा पूर्वलडाकु रहेको अनुमान छ ।
जनयुद्धमा जीवन मरणको लडाई लडेर योगदान दिएको भन्दै त्यसको बदला पार्टी र राज्यले आफूहरुको मागलाई बेवास्ताा गरेको भन्दै उनीहरुले नेपाल बन्दजस्ता विरोध कार्यक्रम गर्दै आइरहेका छन् ।
