२४ असोज, काठमाडौं ।
नेपाल कम्युनिस्ट पार्टीका केन्द्रीय सदस्य चन्द्रबहादुर खड्का ‘असल’लाई सर्वोच्च अदालतमा ल्याइपुर्याइएको छ ।
मकवानपुर प्रहरी हिरासत राखिएका खडकालाई केही समयअघि मात्र ल्याइपुर्याइएको हो । असोज १५ गते नै सर्वोच्चले अदालमा दायर बन्दी प्रत्यक्षीकरण रिट निवेदनमाथिको बहसपछि बाटोको म्यादबाहेक ३ दिनभित्र बन्दी खडकालाई लिखित जवाफसहित अदालतमा उपस्थित गराउन सरकारलाई न्यायाधीश चोलेन्द्र शमसेर जबराको एकल इजलासले आदेश दिएको थियो ।
सरकारले १० दिनपछि बल्ल आज सर्वोच्चमा बहसका लागि उपस्थित गराएको हो । सल्याननिवासी नेता खडकालाई सरकारले बिनाकारण झुठा आरोपमा रिगफ्तार गरी गैरकानूनी रुपमा थुनामा राखेको भन्दै दुर्गाप्रसाद जैसीले उनको थुनामुक्त गर्न माग राखेर असोज १४ गते बन्दी प्रत्यक्षीकरण रिट दायर गरेका थिए ।
खडकालाई यही असोज ४ रुपन्देही जिल्ला अदालतले धरौटी लिई रिहा गर्न आदेश दिएपनि लगत्तै खड्कालाई प्रहरीले पुनः गिरफ्तार गरी असोज १० गते मकवानपुर पुर्याएको थियो । मकवानपुरमा प्रहरीले खडकालाई आगजनी गरेर ‘संगठित अपराध’ गरेको कसुरमा मुद्दा चलाइएको छ ।
पार्टी कामको सिलसिलामा सार्वजनिक यातायात चढेर काठमाडौं आउँदै गर्दा गत भदौ ५ गते बेलुका धादिङको नौबिसेबाट सादा पोशाकका डेढ दर्जन सीआईबी प्रहरीको टोलीले गिरफ्तार गरेको थियो । त्यसपछि ७ गते बुटवल लगिएको थियो । त्यहाँ ‘बम विष्फोट’को मुद्दा चलाइएको थियो ।
गिरफ्तारपछि झण्डै १५ घण्टा बेपत्ता बनाई चरम रुपमा शारीरिक र मानसिक यातना दिई भोलिपल्ट ६ गते महानगरीय प्रहरी परिसर टेकुबाट सार्वजनिक गरिएको थियो ।
