प्रतिवेद तयार भएको तीन महिनापछि प्रदेश-३ को स्थायी राजधानी सम्भाव्यता अध्ययन विशेष समितिले सोमबार प्रदेशसभामा प्रतिवेदन पेश गरेको छ। समितिले पाँच जिल्ला राजधानीका लागि उपयुक्त रहेको सिफारिस गर्दै प्रतिवदेन पेश गरेको हो।
प्रदेशसभामा प्रतिवेदन पेश गर्दै समितिका सभापति दिपक निरौलाले समितिको सर्बसम्मत निर्णयबाट प्रतिवेदन तयार पारिएको बताए। ‘प्रदेश तीनको सबै क्षेत्रको सम्भाव्यता अध्ययन गरेर हामीले प्रतिवेदन तयार पारेका छौं’, उनले भने, ‘दलगत भावनाबाट माथि उठेर सर्बसम्मतरुपमा प्रतिवेदन तयार पारिएकाले राजधानी टुङ्गो लगाउन यसले महत्वपूर्ण सहयोग गर्नेमा हामी विश्वस्त छौं।’
गत असार २६ गते विशेष समितिले सभामुख सानुकुमार श्रेष्ठलाई प्रतिवेदन बुझाएको थियो। काभ्रे, चितवन, नुवाकोट, भक्तपुर र मकवानपुरलाई स्थायी राजधानीका लागि उपयुक्त हुने समितिको प्रतिवेदनमा उल्लेख छ। दुई तिहाई प्रदेशसभा सदस्यले स्थायी राजधानी र नाम टुङ्गो लगाउनसक्ने संवैधानिक व्यवस्था छ। तीन नम्बर प्रदेशसभामा एकसय नौ जना प्रदेशसभा सदस्य रहेका छन्।
राजधानीको विषयले प्रदेशसभामा प्रवेश पाएपछि स्थायी राजधानीबारे चर्चा सुरु भएको छ। काभ्रे र भक्तपुरमध्ये एक स्थानमा मात्र सहमति गरी दुई तिहाई पुर्याउन सत्ता पक्ष नेपाल कम्युनिष्ट पार्टी (नेकपा) भित्रै चलखेल सुरु भएको हो ‘दुई तिहाई पुर्याउनका लागि तीब्र लविङ भइरहेको छ, एक प्रदेशसभा सदस्यले भने, ‘तर हेटौडामै राजधानी राख्न दुई तिहाई पुर्याउन नदिनका लागि पनि लविङ भइरहेको छ।’ दसैं र तिहारको बीचमा बस्ने प्रदेशसभा बैठकमा यसलबारे थप छलफल हुने प्रदेशसभा सचिवालयले जनाएको छ।
